Елімізде тамыз ҰБТ-сы басталды, ол 14 тамызға дейін жалғасады, деп хабарлайды F16.kz тілшісі Ғылым және жоғары білім министрлігіне сілтеме жасап.
Белгілі болғандай, тестілеуге қатысу үшін 28 мыңға жуық өтініш қабылданыпты. ҰБТ-ға қатысушылардың 65%-ға жуығы қазақ тілінде, 35%-ы орыс тілінде, 89 адам ағылшын тілінде тест тапсыруға ниет білдірген.
Тамыз айындағы ҰБТ-ға ағымдағы және өткен жылғы мектеп пен колледж түлектері, қандастар (ҚР азаматы болып табылмайтын ұлты қазақ азаматтар), шетелде білім алған орта білім беру ұйымдарының бітірушілері, шығармашылық мамандықтардан басқа мамандықтарға, сондай-ақ басқа мамандықтардан педагогикалық бағыттарға ауысқысы келетін студенттер мен жоғары оқу орындарына шартты түрде қабылданған студенттер қатысады.
ЖОО-да ақылы негізде өз мамандығы бойынша оқуды жалғастыруды жоспарлап отырған колледж түлектері оқуға әңгімелесу қорытындысы бойынша қабылданады. Бұл ретте оқуға қабылдауды ЖОО-лардың қабылдау комиссиялары жүзеге асыратынын айту керек.
Естеріңізге сала кетсек, тамыз айында өтетін ҰБТ-ға тіркелу Ұлттық тестілеу орталығының сайтында (app.testcenter.kz) 25 шілде мен 5 тамыз аралығында жүргізілген.
