Биылғы 1 қыркүйектен бастап мектептерде ас мәзірін жасау мен тамақ дайындауға медициналық қызметкерлер бақылау жүргізеді. Бұл туралы Денсаулық сақтау министрі Ақмарал Әлназарова мәлім етті, деп хабарлайды F16.kz.
– Білім беру ұйымдарында салауатты тамақтанудың заманауи халықаралық талаптарына сай әзірленген жаңа тамақтану стандарты енгізілуде. Бұл стандарт тағам рационындағы қант мөлшерін 3,6 есе, тұзды – 5 есе азайтуды, сондай-ақ көкөністер, жемістер мен сүт өнімдерін тұтынуды арттыруды көздейді, – деді А.Әлназарова.
Оның айтуынша, тамақтануға бақылау жүргізу өкілеттігін медицина қызметкерлеріне беру тағам сапасы мен қауіпсіздігін арттыруға бағытталған.
Денсаулық сақтау министрлігінің мәліметінше, биыл 312 мектеп пен олардың асханаларында санитарлық тексерулер жүргізілген. Және тексерілген мектептердің үштен бірінен заңбұзушылықтар анықталған. 117 адам әкімшілік жауапкершілікке тартылып, 31 миллион теңгеден астам айыппұл салынған. 90 қызметкер жұмыстан шеттетіліп, 8 іс сотқа жолданған.
Министрлік басшылығы 2024 оқу жылымен салыстырғанда санитарлық-эпидемиологиялық қорытындысы жоқ мектептер саны 1,4 есе азайғанын атап өтті.
Еске салайық, бұған дейін Денсаулық сақтау министрлігі мектеп асханаларына арналған ас мәзірін әзірлеген болатын. Оған суға піскен жылқы еті мен тұздық, жент, құрт және сиыр етінен дайындалған сірне сияқты дәстүрлі қазақ тағамдары енген. Сонымен қатар тізімде пайдалы салаттар, йогурттар, компоттар мен көкөніс турамалары да бар.
