Өскеменде неврологиялық дефициті бар, туа пайда болған кемістігі және дамуында ауытқуы бар балалар ем алатын «Қамқорлық» ерте араласу орталығы жұмыс істеп тұр. Орталық 2023 жылы «Қазақстан халқына», «Қамқорлық» қорлары мен «Samruk-Kazyna Trust» серіктестігі негізінде ашылған, деп хабарлайды F16.kz.
Естеріңізге сала кетейік, 2022 жылы ел Президенті Қасым-Жомарт Тоқаев денсаулық сақтау, білім беру және әлеуметтік қолдау салаларындағы мәселелерді шешу үшін «Қазақстан халқына» қоғамдық әлеуметтік қорын құруды тапсырған. Бүгінде қордың «Ерте араласу орталықтарын жарақтандыру» қайырымдылық жобасы жұмыс істейді.
Қор 2022 жылдан бері Шығыс Қазақстандағы денсаулық сақтау саласында жалпы құны 1,3 млрд теңге болатын 8 жоба жүзеге асырды. Соның бірі — «Қамқорлық» ерте араласу орталығы. Мұнда әкімдіктің қолдауымен жөндеу жұмыстары жүргізілсе, біздің қор тарапынан орталыққа 64,8 млн теңге бөлініп, арнайы заманауи құрылғылар алынды, — дейді “Қазақстан халқына” қорының аға жоба менеджері Динара Нұрқасымова.
Ерте араласу орталығында былтыр 604 бала ем алса, қазір 305 бала ем қабылдап жатыр. Балалармен жұмыс істеу үшін жасақталған мамандардың тобы дайындалған. Сонымен қатар, галоионотерапия, шунгит, емдеу-шынықтыру, ең озық жабдықта диагностикалық аудиологиялық тексеріс және соңғы үлгіде миды зерттейтін ЭЭГ бөлмелері жұмыс істейді.
Бір айдың ішінде 50-ге жуық бала реабилитолог, арнайы логопед, дефектолог және емдік дене шынықтыру нұсқаушысынан оңалту шараларын қабылдай алады. Ем-шараның барлығы МӘМС аясында тегін жүргізіледі. Оң нәтижелер бар. Дамуында ақау бар балалардың жүруі 25 пайызға артты, — дейді орталықтың дәрігер-реабилитологы Құндыз Тоқтарова.
Орталықта балалар ғана емес, жиналған ерекше балалардың ата-анасы да өзара сөйлесіп, бір-біріне психолологиялық қолдау көрсететінін айтады. Баланың дамуына көмектесетін мамандардан бөлек, псхолог та жұмыс тұрақты жұмыс жүргізеді.
Баламды емнің екінші курсына әкелдім. Орталық толықтай жабдықталып, әр маман балаға ерекше көңіл бөледі. Елімізде ерекше балаларға осылай көңіл бөліп, қоғамда бейімдеуге атсалысатынына ерекше қуанамын. Осы орталыққа келгелі басқа да ата-аналармен араласып, жалғыз емес екенімізді сезінеміз, керек кезде бір-бірімізді қолдап, балаларымыздың нәтижесіне қуанамыз, — дейді ерекше баланың анасы Зура Құсайынова.
