Шығыс Қазақстан облысына жұмыс сапарымен келген Қазақстанның Әзербайжан Республикасындағы Төтенше және Өкілетті елшісі Әлім Байел облыс әкімі Нұрымбет Сақтағановпен кездесті, деп хабарлайды F16.kz.
Дипломат өз сөзінде әзербайжандық кәсіпкерлер Шығыстың өнеркәсіп пен туризм саласына ерекше қызығушылық танытып отырғанын атап өтті.
Биыл алты айда екі ел ел арасындағы тауар айналымы 300 миллион АҚШ долларынан асты. Соңғы жылдары сауда-экономикалық, көлік-транзиттік, энергетика, ауыл шаруашылығы және мәдениет салаларындағы байланыс күннен-күнге дамып келеді. Былтыр Мемлекет басшысы Қасым-Жомарт Тоқаев Әзербайжанға үш рет ресми сапармен келді, — деді Әлім Байел.
Айта кетейік, Президент өнеркәсіп және туризм салаларында өзара ынтымақтастықты дамыту бойынша нақты міндеттерде қойған.
Бұл бағытта Әзербайжанмен бірлескен жобалар жүзеге асырудың болашағы зор. Жергілікті кәсіпкерлердің экспортқа ұсынатын өнімдері жетерлік. Сондай-ақ географиялық жақындықты, халықтар арасындағы мәдени байланыстарды және ШҚО-ның туристік әлеуетін ескерсек, әзербайжандық туристерге сауықтыру-емдеу демалысын да ұсынуға мүмкіндік зор, — деп атап өтті аймақ басшысы.
Тараптар экономикалық кооперация бойынша нақты жобалармен жұмыс істеуге уағдаласты.
