ШҚО-да төтенше жағдайлардың алдын алу және жою бойынша «Қалқан-2025» республикалық командалық-штабтық оқу-жаттығулары өтіп жатыр, деп хабарлайды F16.kz.
Ауқымды оқу-жаттығуға Төтенше жағдайлар министрлігінің құтқару бөлімшелері, орталық және жергілікті атқарушы органдар, азаматтық қорғау қызметтері, радиациялық және химиялық қауіпті нысандардың өкілдері, Қорғаныс министрлігінің Ұлттық ұланы мен Шекара қызметінің әскери қызметшілері, сондай-ақ Атом энергиясы агенттігі мен Ядролық физика институтының мамандары жұмылдырылды.
Бүгін оқу-жаттығудың ашылу салтанаты және бірінші кезеңі жүзеге асырылды.
Бұл кезеңде облыстағы ірі өнеркәсіптік нысандарда радиациялық және химиялық апат салдарынан туындаған шартты төтенше жағдайларды жою бойынша практикалық іс-қимылдар пысықталды.
«Қалқан-2025» оқу-жаттығуы барысында алынған тәжірибе мен практикалық дағдылар төтенше жағдайларға ден қою бойынша алгоритмдерді жетілдіруге, сондай-ақ ықтимал апаттардың салдарын барынша азайтуға мүмкіндік береді, — дейді ШҚО ПД баспасөз қызметі.
Оқу-жаттығулар 15 тамызға дейін жалғасады.
