ҚР Ауыл шаруашылығы министрлігінің Ветеринариялық бақылау және қадағалау комитеті Еуразиялық экономикалық одақтың ветеринариялық-санитариялық талаптарының бұзылғаны туралы хабарлады, деп жазады F16.kz тілшісі.
Ауыл шаруашылығы министрлігінен хабарлағандай, «Сырым» ветеринариялық бақылау бекетінде Ресейдің Самар облысынан Қазақстан аумағына өтпек болған жүк көлігі тоқтатылды. Тексеріс барысында аталмыш көліктің 63 мың дана тауық жұмыртқасын тасымалдап келе жатқаны белгілі болды.
– Құжаттық бақылау нәтижесінде заңбұзушылық анықталды: ветеринариялық ілеспе құжаттарда көрсетілген жүк жөнелтуші жануардан алынатын өнімдерді ЕАЭО елдеріне жеткізуге рұқсаты бар ұйымдардың тізіліміне енгізілмеген. Осы себепті жүк кері қайтарылды. Ал жүргізушіге ҚР Әкімшілік құқық бұзушылық туралы кодексінің 406-бабы бойынша әкімшілік хаттама толтырылып, айыппұл салынды. Тасымалдаушыға қолданыстағы ветеринариялық-санитариялық талаптар түсіндірілді, – деп жазады Ауыл шаруашылығы министрлігінің баспасөз қызметі.
Айта кетсек, 2025 жылдың басынан бері ЕАЭО елдерімен шекарада ветеринариялық-санитариялық инспекторлар 57 185 көлік құралын және шамамен 738 мың тонна мал шаруашылығы өнімдерін тексерген. Нәтижесінде 1 020 көлік кері қайтарылып, 397 әкімшілік хаттама толтырылды. Айыппұлдардың жалпы сомасы 19,7 миллион теңгені құрады.
Сонымен қатар, үшінші елдермен шекарадағы өткізу бекеттерінде 21 654 автокөлік, 69 802 теміржол құрамы, 257 теңіз кемесі және 2,139 миллион тоннадан астам мал шаруашылығы өнімі тексерілді. Тексеру қорытындысы бойынша 24 автокөлік кері қайтарылып, 24 әкімшілік хаттама ресімделді.
