Шығыс Қазақстан облысында ауыл шаруашылығы, тамақ және қайта өңдеу саласы қызметкерлерінің күні кең ауқымды шарамен аталып өтті. Өңірдің аграрлық саласында еңбек етіп жүрген фермерлер, кәсіпорын мамандары, ғалымдар мен сала ардагерлері бір жерде бас қосып, жыл бойғы еңбектің нәтижелерін қорытындылады, деп хабарлайды F16.kz порталы.
Соңғы жылдары облысымыз аграрлық секторды жаңарту бағытында айтарлықтай ілгеріледі. 2025 жылы ауыл шаруашылығының жалпы өнімі 17 пайызға өсті. Егістік алқаптарының 40 пайызында дәлме-дәл егіншілік қолданылып, дрондар мен смарт-суару жүйелері шаруашылықтардың басты құралдарының біріне айналды.
Облыстық филармонияда өткен салтанатты рәсім алдында ШҚО әкімі Нұрымбет Сақтағанов өңірдің аграрийлерімен кездесіп, жаңа маусымға дайындық, субсидиялау және қайта өңдеу ісін күшейту мәселелерін талқылады. Сондай-ақ аймақ басшысы ғимараттың екінші қабатында ұйымдастырылған ауыл шаруашылығы саласының көрмесінде әр ауданның инновациялық жобаларымен танысты. Ол саланың қарқынды жаңарып жатқанын, ауыл еңбеккерлерінің табанды еңбегі облыстың азық-түлік қауіпсіздігіне тікелей ықпал етіп отырғанын атап өтті.
Осы ретте, бұл жолғы көрмеге аудандар мен қалалардың аграрийлері қонақьтар назарына өз өңірлерінде өндірілетін ең үздік өнімдерін ұсынғанын айту керек. Мәселен, Марқакөл ауданының фермерлері тары мен талқан, қымыз бен майды молынан ала келіпті. Тіпті, шекара шебіндегі ауданда кондитерлік өнімдер өндіріп, кәсібін дөңгелетіп отырғандар да бар екен.
Аудан әкімінің орынбасары Нұрсұлтан Бейсеновтың айтуынша, өңірде 600-ге тарта кәсіпкер жұмыс істейді. Бүгінде олар ауыл-аймақтағы ағайынның біразын тұрақты жұмыспен қамтып, шалғайдағы ауданның әлеуметтік-экономикалық тұрғыдан дамуына елеулі үлесін қосып отыр.
Мұндай ауылшаруашылығы тауарларының көрмелері мен жәрмеңкелеріне қатысатын Зайсан ауданының әдеттегідей көпшілікке ұсынатын өнімдерінің алуан түрлілігімен ерекшеленетіні бар. Бұл жолы да солай болды. Қонақтар назарына өнімнің түр-түрі ұсынылды.
– Бүгін біз MIGLIOR суы, тары-талқан, жент пен құрт, шұжықтың мол түрін әкелдік. Бұл өнімдеріміз облыс пен республика аумағына ғана емес, көрші елдерге де экспортталады, – деді аудан әкімдігінің өкілдері.
Ал салтанатты жиынның өзінде Шығыстың ауыл шаруашылығы саласында ерекше көзге түскен мамандар марапатталды. Президенттік деңгейдегі «Еңбек Даңқы» ордендері, «Құрмет» ордені, салалық медальдар, министрлік және облыс әкімінің алғыс хаттары табысталды. Фермерлер, зоотехниктер, агрономдар, технологтар, кооператив жетекшілері мен кәсіпкерлердің еңбектері атап өтілді.
Агроөнеркәсіптік кешеннің әр бағыты бойынша 22 номинация белгіленіп, дәнді дақылдар өндірісі, мал шаруашылығы, бал және балық шаруашылығы, қайта өңдеу, сүт өндірісі, кооперация, сондай-ақ саланы ақпараттық қолдау сияқты түрлі сектордың үздіктері марапатталды.
Сонымен бірге облыста өткен ауыл шаруашылығы өнімдерінің ірі көрмесінің қорытындысы жарияланды. Шараға 11 аудан мен 2 қала қатысып, өнімдері мен өңірлік ерекшеліктерін көрсетті. Гран-при Өскемен қаласына берілді, ал Зайсан ауданы «Үздік аудан» деп танылды.
– Ауыл шаруашылығы Шығыс Қазақстанның ғана емес, бүкіл ел экономикасының маңызды бағыттарының бірі саналады. Егіншілік пен мал шаруашылығында еңбек етіп жүрген азаматтар өңірдің де, мемлекеттің де өркендеуіне елеулі үлес қосуда. Баршаңызға зор денсаулық пен қажымас қайрат тілеймін, – деді салтанатты жиында сөз сөйлеген ШҚО әкімі Нұрымбет Сақтағанов.
Мерекелік іс-шара ән-жырмен жалғасып, облыстың шығармашылық ұжымдары мен ауыл шаруашылығы саласының өкілдері өнер көрсетті.
2025 жылдың қорытындысы Шығыс Қазақстанның республикамыздағы ірі аграрлық орталықтардың бірі ретінде өз позициясын нығайтқанын көрсетті. Егістік көлемінің ұлғаюы, жаңа технологиялардың белсенді енгізілуі, цифрландыру мен кооперацияны дамыту – мұның бәрі өңірдің аграрлық сектордағы жаңғыру бағыты әрі қарай да жалғасатынын білдіреді.
