Биылғы 1 қыркүйектен бастап 18 жасқа толмаған өскемендіктер мен қала қонақтары шаһардағы қоғамдық көліктермен тегін жүретін болады. Бүгін өткен қалалық мәслихаттың сессиясында халық қалаулылары осындай шешім қабылдады, деп хабарлайды F16.kz.
Жиынға қатысқан Өскемен қаласының әкімі Алмат Ақышов бұл қадам әлеуметтік қолдау шараларын дамытуға бағытталған кешенді бағдарламаның бір бөлігі ғана екенін атап өтті.
– Біз көліктік жеңілдіктерді бір реттік шара ретінде емес, тұрғындарға қолайлы жағдай жасауға бағытталған ұзақ мерзімді саясаттың бір бөлігі ретінде қарастырамыз. Балалардың жол жүру ақысын тегін қылу – бұл болашаққа жасалған маңызды инвестиция, себебі әңгіме қаламыздың жас тұрғындарын қолдау туралы болып отыр, – деді А.Ақышов.
Сондай-ақ мәслихат депутаттары өзге санаттағы азаматтарға да жеңілдіктер беруді қолдады. Мәселен, 70 жастан асқан тұрғындар қоғамдық көлікте 55% жеңілдікпен жүреді. Ал Ұлы Отан соғысының қатысушыларына, басқа елдердегі әскери қимылдарға қатысқан ардагерлерге және Өскемен қаласының құрметті азаматтарына қоғамдық көлікпен жүру тегін болады.
Сонымен бірге трамвайда тегін жүру құқығына төмендегі санаттағы азаматтар ие болмақ:
- I топтағы мүгедектер;
- II топтағы көз мүгедектері (көру қабілеті нашар жандар);
- «Алтын алқа», «Күміс алқа» иегерлері, «Батыр ана» атағына ие болған немесе I және II дәрежелі «Ана даңқы» ордендерімен марапатталған көпбалалы аналар;
- 80 жастан асқан қала тұрғындары.
