Еліміздің жетекші педиатриялық орталықтарында Гемопоэтикалық бағаналы жасушаларды (ГБЖ) транспланттаудың 515 операциясы жасалған, деп хабарлайды F16.kz тілшісі.
Денсаулық сақтау министрлігінен хабарлағандай, бұл жайт республикада онкологиялық ауруларға шалдыққан балаларға көрсетілетін жоғары технологиялық көмектің ауқымы қаншалықты зор екенін аңғартса керек.
Белгілі болғандай, 515 отаның ішінде 230-ы аллогенді, 205-і аутологті және 80-і гаплоиденттік трансплантация екен.
– 2012 жылдан бері жұмыс істеп келе жатқан Қазақстан-Ресей гистотиптелген донорлар тіркелімінің кеңеюінің нәтижесінде туыстық емес аллогенді трансплантациялардың саны біршама артқан. Қазіргі кезде тіркелімде 12 мыңнан астам донор бар, олардың 13-і қазақстандық балаларға донор болған. Сондай-ақ Германия, Ресей және Польша донорларының қатысуымен 28 трансплантация жасалды, – деп жазады министрліктің баспасөз қызметі.
Сондай-ақ ортопедиялық онкология саласында да оң динамика байқалады. Елімізде сүйек ісіктері бар балаларға буындарды эндопротездеу ойдағыдай жүзеге асуда. Бұл ретте 3D-модельдеу технологиясы және кіші жастағы балаларға арналған «өсетін» протездерді орнату әдістері сәтті енгізіліп жатқанын айту керек.
