Соңғы жылдары елімізде онкология бойынша статистикалық деректер азаймай тұр. Мәселен, ШҚО-да жыл басынан бері тек гинекологиялық қатерлі ісік диагнозы 152 адамға қойылған. Бұл туралы облыстық денсаулық сақтау басқармасы басшысының орынбасары Айнаш Қапанова айтты, деп хабарлайды F16.kz.
Дүниежүзілік денсаулық сақтау ұйымының мәліметіне сүйенсек, гинекологиялық қатерлі ісік әйелдер арасында ең жиі кездесетін онкологиялық аурулардың қатарына жатады. Оның ішінде жатыр мойны обыры көп таралған.
Ал Қазақстан бойынша бұл дерт екінші орында. Жыл сайын елде шамамен 4000 гинекологиялық қатерлі ісік жағдайы тіркелсе, оның ішінде 1900 адамға жатыр мойны обыры диагнозы қойылады. Аты жаман аурудан 600-ге жуық әйел көз жұматын көрінеді.
Облыс бойынша 8 айда 152 адамға гинекологиялық қатерлі ісік диагнозы қойылды. Атап айтқанда, жатыр мойны обыры 59, жатырдың дене обыры 60 және аналық без обыры 33 әйелде анықталған, — дейді Айнаш Қапанова.
Осы ретте мамандар уақытылы тексерістен өтіп, дигностика жүргізу аурудың алдын алуға көмектесетінін айтады.
Мәселен, биыл скрининг пен алдын ала тексерілудің арқасында 73%-дан астам жағдай бірінші кезеңде анықталған. 8 ай ішінде 27 мыңнан астам зерттеу жүргізілген.
Скринингтің тиімділігі дәлелденіп отыр. 334 жағдайда обыр алды аурулар анықталды, бұл 2024 жылмен салыстырғанда 30%-ға көп. 11 әйелде жатыр мойны обыры тіркелді, олардың 82%-ы бірінші кезеңде анықталды. Салыстырмалы түрде айтсақ, биыл мұндай 5 жағдай тіркелсе, олардың екеуі ғана ерте кезеңде анықталған еді, – деді ШҚО Көпсалалы онкология және хирургия орталығының директоры Гүлмира Сағидуллина.
