Өскемен қаласында жеке кәсіпкер әйел алаяқтың құрбаны болып, полицияға арызданды, деп хабарлайды F16.kz тілшісі Polisia.kz сайтына сілтеме жасап.
– Оқиға жаз айларында басталған. Дүкенге келген бейтаныс әйел өзін қаржы мәселелерін шешуге және бизнесті дамытуға көмектесетін адам ретінде таныстырған. Жалған бизнес-жоспарын ұсынып, кәсіпкердің сеніміне кірген, – деп жазады дерек көзі.
Белгілі болғандай, күдікті екі ай ішінде түрлі сылтаулармен, оның ішінде несие рәсімдеу үшін деп, жәбірленушіден жалпы сомасы 23 миллион теңге алған. Сонымен қатар пайызбен қарыз алып, қолхаттар жазып бергенімен, тамыз айының соңына дейін қаражатты қайтарамын деген уәдесін орындамаған.
Аталған дерек бойынша алаяқтық бабымен сотқа дейінгі тергеу жүргізілуде. Осы ретте полиция азаматтарды қаржылық мәселелерді шешемін деп уәде ететін бейтаныс адамдарға сенбеуге шақырады.
– Бизнеске қатысты кез келген ақпарат пен құжаттың шынайылығын мұқият тексеріңіздер. Ресми шартсыз ірі көлемде ақша бермеңіздер. Үшінші тұлғалардың өтініші бойынша несие рәсімдемеңіздер. Қолхат ақшаңызды қайтатынына кепіл бола алмайды. Күмәнді жағдай туындаған жағдайда дереу 102 нөміріне хабарласу ұсынылады, – дейді мамандар.
