Елімізде «Мал ұрысы» атты кең ауқымды жедел-профилактикалық іс-шарасы мәресіне жетті. Бұл – ауыл тұрғындарының мүлкін қорғауға және мал ұрлығын болдырмауға бағытталған Ішкі істер министрлігінің жоспарлы іс-шарасы, деп хабарлайды F16.kz тілшісі Polisia.kz сайтына сілтеме жасап.
Дерек көзінің мәліметінше, үш күн ішінде полиция қызметкерлері мал тасымалдаған 12 мыңнан астам көлікті, 3,5 мыңнан аса сатып алу орындарын, сондай-ақ 8 мың шаруа қожалықтары мен фермаларды тексерді. Нәтижесінде Астана мен Алматы қалаларында алты заңсыз мал сою цехының жұмысы әшкереленіп, елорданың базарларының бірінде ет сатуға арналған жалған мөр қолдану фактісі анықталды.
Полиция мал ұрлығына қатысы бар 113 адамды ұстады. 20 қылмыстық топтың әрекеті тоқтатылды. 107 мал ұрлығы жедел ашылып, 800-ден астам бас мал иелеріне қайтарылды.
– Малды қараусыз қалдырмаңыздар, міндетті түрде таңбалап, жоғалған жағдайда бірден полицияға хабарласыңыздар. Әрбір сағаттың маңызды екенін есте сақтаңыздар, – дейді ІІМ криминалдық полиция департаментінің басқарма бастығы Жандос Мұхатов.
