Өскеменнің «Алтай» футбол клубы Қазақстан Премьер-лигасына шығуға жақын. Ол үшін жерлестеріміз соңғы екі ойында барынша көп ұпай жинауы керек, деп хабарлайды F16.kz порталы.
Ертең, 17 қазан күні жерлестеріміз Қазақстанның Бірінші лигасы аясындағы кезекті ойынын өткізеді. Бұл жолғы қарсылас – Павлодардың «Ертісі». Кезінде жоғарғы лигада өнер көрсетіп, 5 дүркін ел чемпионы атанған павлодарлық команда қазір – Бірінші лига көшбасшыларының бірі. Бүгінгі турнирлік кестеге көз жүгіртсек, «Ертістің» қоржынында 57 ұпай бар екенін көреміз. Ал біздің команда еншісінде 51 ұпай бар. «Алтайдан» бір ұпай кем жинаған тағы бір атақты команда – Қарағандының «Шахтері» төртінші орында орналасқан.
Қазірдің өзінде турнир кестесінің 1-ші және 2-ші орындарында орналасқан «Каспий» (Ақтау) мен «Ертісті» Қазақстан Премьер-лигасына шығуларымен құттықтай беруге болатын сияқты. Енді олармен бірге элиталық дивизионға өтетін үшінші команданы анықтау ғана қалды.
Чемпионаттың аяқталуына небары екі тур қалғанын ескерсек, ҚПЛ-ға берілетін үшінші жолдама үшін бәсеке тартысқа толы болайын деп тұр. Сол себепті, ертеңгі ойында өскемендік командағы сүрінуге еш болмайды. Еліміздің ең жоғарғы лигасында ойнағымыз келсе, бізге тек жеңіс қажет.
Осыған байланысты, «Алтай» футбол клубының басшылығы өскемендіктер мен қала қонақтарына үндеу жасады.
– Бұл – биылғы маусымдағы соңғы ойындарымыздың бірі, және дәл сенің қолдауың біздің команданың да, қаламыздың да арманына жету жолындағы шешуші күш бола алады. Қазанның 17-сі, сағат 15:00-де «Восток» стадионына кел және Шығыстың күші – бірлікте екенін дәлелде! – делінген клуб хабарламасында.
Осы ретте, ертең «Алтай» мен «Ертіс» арасындағы шешуші матчқа стадионға кіру тегін болатынын айтқан жөн.
Сонымен бірге, ертеңгі матч кезінде стадион аумағында келесі аймақтар жұмыс істейтінін еске саламыз:
- «Аякс» спорт дүкенінің сауда нүктесі;
- «Dodo Pizza» пицца желісі;
- Altai FC фан-шопы @f.c.altai – нағыз жанкүйерлерге арналған фирмалық өнімдер және тағы басқалар.
