Келесі маусымда Өскеменнің «Аltai» футбол клубы Қазақстан Премьер-лигасында өнер көрсетеді. Бұл туралы бүгін «Аltai» мен «Оңтүстік» арасындағы ойыннан кейін белгілі болды, деп хабарлайды F16.kz.
Футболдан Бірінші лига аясындағы Қазақстан чемпионатының соңғы турында өскемендік команда өз алаңында Шымкенттің «Оңтүстігін» қабылдаған болатын. Осыған дейін қоржынында 52 ұпай болған «Аltai» командасына соңғы матчта тең нәтиже де жеткілікті еді. Алайда, жерлестіріміз бұл күні «Восток» стадионына жиналған жанкүйерлерін жарқын жеңіспен қуантқысы келгендей.
Ойынның алғашқы минуттарынан шабуылға лап қойған алаң иелері қарсылас қақпасынан төрт мәрте саңылау тапты. Көзге түскен Сэйф Попов (8-минут), Артем Тетерин (49-минут), Гаврил Кан (61-минут) пен Ибрагим Дадаев (74-минут). Бұған шымкенттік команда ойынның 78-минутында соғылған Біржан Тоқтыбайдың голымен ғана жауап бере алды. Қорытынды есеп – 4:1!
Осы жеңісінен кейін 55 ұпай жинаған «Аltai» Бірінші лига аясындағы жарысты үшінші орынмен аяқтады. Бұл орын келесі маусымда еліміздің ең жоғары дивизионы – Қазақстан Премьер-лигасында өнер көрсетуге мүмкіндік береді.
Айта кетейік, ҚПЛ жолдамасына өскемендік командадан бөлек, «Каспий» (Ақтау) мен «Ертіс» (Павлодар) те ие болды.
