Чемпиондар лигасындағы жарқын жеңісінен кейін алматылық «Қайрат» футбол клубының бас бапкері Рафаэль Оразбахтинге белгілі кәсіпкер көлік мінгізді, деп хабарлайды F16.kz.
Astana Motors компаниясының негізін қалаушы Нұрлан Смағұлов Алатау баурайындағы тарихи жеңістен кейін «Қайраттың» бас бапкеріне Hyundai Palisade маркалы темір тұлпардың кілтін табыс етті.
Біз сіздердің жеңістеріңізді мақтан тұтамыз. Бұл – тек «Қайрат» үшін емес, бүкіл Қазақстан футболы үшін үлкен қадам. Жаңа жетістіктер тілейміз және әрдайым команданы қолдауға дайынбыз. «Қайрат» Еуропаны таңғалдыра алады деп сенемін. Алда сіздерді мадридтік «Реалмен» матч күтіп тұр, ол Алматыда өтеді. Бұл – әлемдік деңгейдегі оқиға, біз сіздерге жанкүйер боламыз, – деді Нұрлан Смағұлов.
Рафаэль Оразбахтин көрсетілген құрметке алғыс айтып, бұл жеңіске бүкіл команда штабы мен ойыншылардың арқасында қол жеткенін атап өтті.
Мен үшін ең алдымен мұндай сыйлық алу — үлкен құрмет. Мұндай көңіл мен сенім үшін алғыс білдіремін. Бұл тек менің еңбегім емес екенін ерекше атап өткім келеді. Бұл ең алдымен футболшылардың, жаттықтырушылар штабының, медициналық қызметкерлердің және бүкіл клубтың ортақ еңбегі. Сондай-ақ бізді әрқашан қолдап, сенім білдіріп жүрген жанкүйерлерімізге алғыс айтқым келеді. Ал біз өз тарапымыздан қазақстандықтарды жаңа жетістіктерімен қуантуға тырысамыз, — деді «Қайрат» клубының бас бапкері.
«Қайраттың» қақпашысы Темірлан Анарбеков те назардан тыс қалмады. Оған Нұрлан Смағұлов Apple MacBook табыстап, қазақ елі жас таланттың болашағынан зор үміт күтетінін айтты.
