Үш күнге созылатын «Шығыс Салбурыны-2025» халықаралық фестивалінің алғашқы күні қонақтар назарына бүркіт, ителгі, қаршыға құстарын қолға шақыру, кептерге салу сияқты іс-шаралар ұсынылады, деп хабарлайды F16.kz.
Фестивальдің ұйымдастыру комитетінен мәлім еткендей, бүгін құсбегілердің спорттық киімін, жабдықтарын, құстың тұлғасын, күйін, сипаты мен ерекшелігін бағалау іс-шаралар да өтуге тиіс.
Ал ертең, яғни 10 қазан күні бүркітті шырғаға салу, ителгі, қаршыға құстарын қолға шақыру және кептерге салу секілді сайыстар жалғаспақ.
Фестивальдің соңғы күні – 11 қазанда алыс-жақыннан келген қонақтар бүркіт, ителгі және қаршыға жарыстарының шешуші бәсекелерін тамашалай алады. Сонымен қатар бұл күні Бүркіт төбеге келушілер назарына тазы жүгірту, жамбы ату, теңге ілу, асау үйрету, шоу-айтыс сияқты қызықты іс-шаралар ұсынылады.
