Мадридтік «Реал» Чемпиондар лигасының жалпы кезеңі аясындағы «Қайратпен» өтетін матч алдында УЕФА-ға ерекше өтініш білдірді, деп хабарлайды F16.kz тілшісі Sports.kz сайтына сілтеме жасап.
«Diario Madridista» басылымының мәліметінше, Корольдік клуб УЕФА-дан «Қайратқа» қарсы матч өтетін Алматыдағы Орталық стадионның газонын қайта қырқуды сұраған. Олар газон биіктігі 25 миллиметр болуын қалаған. Алайда бұл өтініш УЕФА тарапынан қабылданбады, себебі ереже бойынша газонның ең жоғары биіктігі 30 миллиметрден аспауға тиіс екен. Сондықтан қазақстандық клубтың алаң шөбін әдеттегіден сәл биіктеу қалдыру туралы шешімі заңды деп танылды.
«Реал» әдетте шөптің биіктігі 22 миллиметрден аспайтын алаңдарда ойнап үйренген. Соңғы маусымдарда мадридтіктер доп тепкен ең биік газон қонақта «Хетафемен» өткен матчта тіркелген. Ондағы газонның биіктігі 27 миллиметрге жетіпті.
Дегенмен, УЕФА Алматының Орталық стадионындағы газонды қайта қырқуға рұқсат берген жоқ, өйткені оның қазіргі биіктігі регламентке сай келеді.
Еске салайық, УЕФА Чемпиондар лигасының жалпы кезеңі аясындағы «Қайрат» пен «Реал» арасындағы ойын бүгін, 30 қыркүйекте кешкі сағат 21:45-те басталады. Матчқа Марко Гуида бастаған италиялық төрешілер бригадасы төрелік етпек.
