«Халық қатысатын бюджет» жобасына өтінім 20 қаңтар мен 1 наурыз аралығында қала әкімдігі аппаратының ресми сайтында қабылданады, деп хабарлайды F16.kz.
2027 жылға арналған «Халық қатысатын бюджет» жобасына ұсыныстарды қабылдау, дауыс беру және өтінімдерді қарау жөніндегі іс-шараларды өткізу мерзімдері ресми сайтта «Халық қатысатын Бюджет 2027» бөлімінде жарияланады, — делінген қала әкімдігінің хабарламасында.
Жобалық ұсыныстарға қойылатын талаптар:
1) ортақ пайдалану объектісі;
2) тиісті аумақтардың тұрғындар үшін өзектілігі;
Бұл ретте басымдық бір жыл ішінде іске асыруға болатын жобалық ұсыныстарға беріледі.
Дауыс беруге рұқсат етілмейтін жобалық ұсыныстар:
1) тұтас емес, бірақ фрагменттік сипаттағы (болашақта қосымша элементтерді іске асыруды талап ететін);
2) тиісті елді мекеннің даму басымдықтарына сәйкес келмейтін;
3) жеке коммерциялық сипаттағы ұсыныстарды іске асыруды көздейтін;
4) тиісті елді мекеннің құрамдас бөліктерінде ұқсас іске асырылған жобалар болған жағдайда.
Халық қатысатын бюджет шеңберінде дауыс беруге рұқсат беріліп, іске асырылатын жобалар:
1) аумақты көгалдандыру;
2) тротуарларды абаттандыру;
3) тротуарларды, пандустарды, арықтарды салу және жөндеу;
4) ортақ пайдалану орындарын (саябақтар, скверлер, жаяу жүргіншілер аймақтары және өзге де объектілер) құру, жөндеу және жарықтандыру;
5) бордюрларды, төсемтастарды, тіреуіш қабырғаларды жөндеу;
6) қоқыс тастайтын жерлерді жою;
7) жалпыға ортақ пайдалану орындарында орындықтар, қоқыс жәшіктері және балалардың ойнайтын және ересек тұрғындар демалатын жабдықтар мен құрылымдарды орнату және жөндеу;
8) аула аумақтарында және ортақ пайдалану орындарында спорттық (жаттығу алаңдарын, футбол, баскетбол, волейбол алаңдарын), балалар ойын алаңдарын орнату, жөндеу және жарықтандыру;
9) санитариялық жағдайды қамтамасыз ету.
Бір жобалық ұсынысты іске асырудың шекті құны өтінім беру сәтінде республикалық бюджет туралы заңда белгіленген айлық есептік көрсеткіштің он мың еселенген мөлшерінен, яғни 64 875 000 теңгеден аспауға тиіс.
Халық қатысатын бюджет шеңберіне кірмейтін жұмыс түрлері:
— Жол шұңқырларын жөндеу;
— Жолдарға қиыршық тас төсеу;
— Жолдарды орташа жөндеу.
