ШҚО әкімі Нұрымбет Сақтағанов Өскемендегі қоқыс сұрыптайтын зауыттың жұмысымен танысты. 2022 жылы ашылған бұл зауыт сағатына 25 тонна қалдықты өңдейді, деп хабарлайды F16.kz.
Бөлек жиналған қалдықтар қоқыс тасымалдайтын көліктермен осында жеткізіліп, қабылдау бункеріне төгіледі, одан әрі таспалы конвейер арқылы сұрыптау желісіне жіберіледі.
Сұрыптау желісінің өндірістік қуаты санитарлық-қорғау аймағының нормативтеріне сәйкес қабылданған.
Қазір зауытта барлығы 40-тан астам адам жұмыс істеп жатыр. Штаттық кестеге сәйкес, еңбек процесі тәулігіне 12 сағаттан екі ауысым бойынша ұйымдастырылған.
Облыс әкімі облыс орталығында қатты тұрмыстық қалдықтарды өңдеу зауыты салынатын жерді қысқа уақыт ішінде бекіту керектігін айтты
Бізге зауыт салу үшін 6 гектар жер керек. Қоқыс сұрыптайтын зауыт аумағындағы жерді қарастырыңыздар. Сонда бізде қоқысты сұрыптайтын әрі өңдейтін бір зауыт болады, — деді Нұрымбет Сақтағанов.
Аймақ басшысы жауапты басқарма басшылары мен Өскемен қаласы әкімдігіне 3 ақпанға дейін тұрмыстық қатты қалдықтарды өңдеу зауытын салу үшін жер учаскесін таңдау бойынша нақты ұсыныс енгізу міндетін қойды. Сондай-ақ зауыт құрылысын инвестициялық жобалар тізіміне енгізу қажеттігін атап өтті.
