Өскеменде ірі көлемдегі есірткі заттарын сақтаған тұрғын ұсталды. Операция облыс прокуратурасының үйлестіруімен жедел профилактикалық іс-шаралар аясында жүргізілді, деп хабарлайды F16.kz.
Жедел іздестіру шараларының нәтижесінде есірткі заттарының заңсыз айналымына қатысы бар 27 жастағы қала тұрғыны анықталған.
Жүргізілген тінту барысында оның гаражынан өсімдік тектес зат салынған екі қорап, көлемі 120 литр болатын жартылай толтырылған алты пластик бөшке және қалдықтары бар үш бөшке мен буып-түюге, қаптауға арналған материалдар тәркіленді. Сараптама қорытындысына сәйкес, тәркіленген зат жалпы салмағы 93 келіден асатын аса ірі мөлшердегі кептірілген марихуана екені анықталды, — деп хабарлады ШҚО ПД баспасөз қызметі.
Қазір күдікті ұсталып, уақытша ұстау изоляторына қамалды.
Шығыс Қазақстан облысы полиция департаменті есірткі заттарының заңсыз айналымымен айналысқан адамдарға мүлкін тәркілей отырып, 7 жылдан 12 жылға дейін бас бостандығынан айыру жазасы берілетінін ескертеді.
