Облыс орталығында «ескі қала» аумағындағы аулаларда автотұрақтар кеңейтілуі мүмкін. Қазір қала әкімдігі аталған бағдарламаны іске асыруға дайындық жұмыстарын жүргізіп жатыр, деп хабарлайды F16.kz.
Қалалық тұрғын үй-коммуналдық шаруашылық бөлімі қолданыстағы заңнамаға сәйкес іс-қимыл алгоритмінің жобасын әзірлеген.
Бағдарлама аясында аулаларды іріктеу регламенті, критерийлері мен кезегі бекітіледі. Келіп түскен өтінімдерді арнайы құрылған жұмыс комиссиясы қарайды.
Бағдарламаның негізгі шарты қандай?
Бағдарламаға қатысудың негізгі шарттарының бірі — пәтер иелерінің өз аулаларын абаттандыру туралы шешім қабылдауға белсенді қатысуы. Тұрғындар жұмысты жүргізуге келісім беріп қана қоймай, абаттандыру аяқталғаннан кейін аула аумағын күтіп-ұстау міндеттемесін де өз мойнына алуға тиіс. Бұл ретте жер учаскесін жалға алу құқығын рәсімдеу де қарастырылған.
Тұрғындарға не істеу қажет?
Өтінім беру үшін тұрғындар келесі қадамдарды орындауы керек:
- Аула орналасқан жер учаскесінің мәртебесін нақтылау, оның ішінде жер пайдалану (жалдау) құқығының бар-жоғын және қолданылу мерзімін тексеру.
- Егер жарамды жалдау құқығы болмаса, жер учаскесін заңда белгіленген тәртіппен рәсімдеу.
- Кондоминиум объектісінің меншік иелерінің жалпы жиналысын өткізіп, келесі құжаттарды рәсімдеу:
* жиналыс хаттамасы;
* жазбаша дауыс беру бойынша сауалнама парақтары (типтік нысан бойынша);
* автотұрақ орындарын салуға және кеңейтуге келісім туралы шешім;
* жоспарланған автотұрақ аумағындағы ағаштарды кесуге келісім (қажет болған жағдайда);
* жасыл желектерді кесуге өтінім беру үшін жауапты тұлғаны анықтау.
- Құжаттарды дайындап, ТКШ бөліміне тапсыру (мекенжайы: Қазақстан көшесі, 27, 302-кабинет).
Қажетті құжаттар тізімі:
* меншік иелерінің жалпы жиналысының хаттамасы;
* аула аумағын жалға алу шарты (топотүсірілім қоса тіркеледі);
* шарт болмаған жағдайда, мемлекеттік қызмет арқылы ЕГКН жүйесінде өтінім берілгенін растайтын құжат;
* тұрғындардың ұсынысы бойынша автотұрақтарды кеңейту шекаралары алдын ала көрсетілген жағдайлық схема.
Құжаттар қабылданғаннан кейін ТКШ бөлімі жер қатынастары бөлімімен бірлесіп эскиздік жобаны келісіп, инженерлік желілердің өтуін ескере отырып, автотұрақтарды кеңейту шекараларын нақтылайды.
Барлық қаралған өтінімдер жұмыс комиссиясының қарауына шығарылады. Комиссия бекітілген бюджет лимиттері шеңберінде аулаларды іріктеу тәртібі мен кезектілігін анықтайды.
Алғашқы кезеңде бөлінген қаражат көлемінде бағдарламаға енгізілетін 20 аула бекітіледі. Қазір алдын ала тізімдер жасалып жатыр.
