Өскемендік такси жүргізушісі көлігіне отырған зейнеткерді алаяқтардың арбауынан сақтап қалды. Сондай-ақ хабарласқан алаяқтарды өзіне 2 мың теңге жолақысын аударуға мәжбүрлеген, деп хабарлайды F16.kz.
Таксиге тапсырысты үшінші тұлға, яғни бөгде адам рәсімдеген. Ол қосымшадағы ішкі чат арқылы жүргізушіге көлікке егде жастағы әйел отыратынын хабарлап, жолақысын аудару үшін телефон нөмірін сұраған.
Жолаушының қатты мазасызданып отырғаны көрініп тұрды. Жол бойы біреу қайта-қайта қоңырау шалып жатты. Оған түрлі мәліметтерді айтып, «ұлым» деп атады. Жағдайдың күмәнді екенін бірден сезіп, бейнежазбаны қосып, жолаушыға телефондағы адам SMS арқылы келген кодтарды сұраса, өте күмәнді екенін ескерттім , – дейді Төрежан.
Осыдан кейін әйел қоңырауды бірден тоқтатқан.
Белгілі болғандай, бұған дейін зейнеткерге белгісіз біреу хабарласып, банк шотынан дәл қазір ақша шешіп алуға әрекет жасалып жатқанын айтады.
Жинаған ақшасын сақтап қалу үшін алаяқтар зейнеткерді шұғыл түрде банкке барып, қолма-қол ақшаны шешіп, оны «қауіпсіз шотқа» аударуға сендірген. Сонымен қатар олар сапар барысында күмән тудырмас үшін телефондағы адамды міндетті түрде «ұлым» деп атауды тапсырған.
Жағдайдың мән-жайын түсінген Төрежан сапарды бірден тоқтатып, жолаушының жақындарының байланыс нөмірін анықтап, күйеу баласына хабарласады. Ол енесін үйіне жеткізіп салуды өтінеді. Бірақ бұған дейін жүргізуші алаяқтарға өздерінің әдісімен жауап қайтаруды жөн көреді.
Алақтарға қайта хабарласып, жолаушыны жеткізгенімді, жолақысын төлемейінше ешқайда жібермейтінімді айттым. Алаяқ сол сәтте бір жарым миллион теңгеге қол жеткіземін деп ойлаған болуы керек, бірден маған екі мың теңге аударып жіберді. , – дейді Төрежан.
Тапсырыс қабылданған inDrive сервисі жүргізушінің әрекетіне пікір білдіріп, оған лайықты марапатын тапсырып үлгерген.
Біз Төрежанның азаматтық жауапкершілігіне, сергектігіне және өзгеге бейжай қарамайтын ұстанымына шынайы тәнтіміз. Күрделі жағдайда айналаңыздағы адамдарға жанашырлықпен қарап, дер кезінде мән беру кейде шешуші рөл атқарады. Біз осындай серіктестердің біздің платформамен бірге жұмыс істейтінін мақтан тұтамыз, – деді Қазақстандағы inDrive бизнесінің басшысы Арай Бекембаев.
