Бүгіннен бастап Өскемендегі қоғамдық көліктерде жолақысын төлеудің қосымша тәсілі іске қосылды. Енді тұрғындар банктерінің мобильді қосымшалары арқылы да жолақысын төлей алады, деп хабарлайды F16.kz.
Жаңа функционал ONAY! сервистерін цифрландырудың екінші кезеңі аясында енгізіліп, жолаушыларға төлем жасаудың ыңғайлылығын арттыруға бағытталған.
Қазір жолаушылар карта арқылы, автобустарда орнатылған ONAY! QR-стикерлерді сканерлеу немесе кодты қолмен енгізу арқылы төлейді. Енді Halyk және Kaspi банктерінің мобильді қосымшалары арқылы да жолақысын төлеу қолжетімді.
Төлемнің жаңа әдісін енгізу — көлік қызметтерін өңірдің жолаушыларына ыңғайлы әрі қолжетімді ету үшін жасалған кезекті қадам,- деп атап өтті Шығыс Қазақстан облысы бойынша Көлік холдингі филиалының директоры Арман Ысқақов.
Бүгінгі таңда қалада 11 тасымалдаушы 51 маршрут бойынша тасымалдауды қамтамасыз етеді, 415 автобуста 853 көлік терминалы және 3,5 мыңнан астам ONAY! QR стикер орнатылған.
