Шығыста заңсыз пайдалы қазбалар өндіруді тоқтату үшін жүйелі шаралар қабылданып жатыр. Бұл туралы облыстық кәсіпкерлік және өнеркәсіп басқармасының басшысы Исатай Аңсат әкімдің отырысы барысында айтты, деп хабарлайды F16.kz.
Соңғы жылдары облыс аумағында экологиялық заңнаманы бұзып, заңсыз алтын өндіру фактілері көбейді. Қаншасы ұсталып, жауапқа тартылса да тыйылмай тұр.
Жыл басынан бері прокуратура, ҰҚК, экология және полиция департаментінің бірлескен жұмыс нәтижесінде заңсыз қымбат металдарды өндіру дерегі бойынша 9 қылмыстық іс қозғалған.
7 келіден астам алтын және 30 техника, атап айтқанда, бульдозер, экскаватор, самосвалдар мен жүк тиегіш тәркіленді. Сондай-ақ ел аумағында заң бұзғаны үшін 75 Қытай азаматы елден шығарылды, — дейді басқарма басшысы.
Заңсыз алтын өндірушілер даланың қорыс-қопасын шығарып, өзен-көлді ластайды. Салдарынан табиғатқа орны толмас зала келіп, экологиялық проблемалар туындап жатыр.
Жер қойнауын игеруші негізінен табиғатқа келтірген залалды өтеуге міндетті. Алайда, олар жауапкершілік алмас үшін құзырлы органдардан жасырын жұмыс істейді.
