Wildberries деректеріне сенсек, Республика күніне орай ұйымдастырылған «Береке Fest» акциясы аясында қазақстандық кәсіпкерлердің тауарларына сұраныс артқан, деп хабарлайды F16.kz.
Cауда және интеграция министрлігінің мәліметі бойынша биылғы қазан айының ортасынан бастап, яғни Wildberries платформасында акция басталғалы бері қазақстандықтардың онлайн-сатып алуға деген қызығушылығы өткен аптамен салыстырғанда 5%-ға өскен.
– Акцияға 8,5 мыңнан астам қазақстандық кәсіпкер қатысуда. Олар өз тауарларына 10%-дан 90%-ға дейін жеңілдік мөлшерін өз бетінше белгілейді, – деп хабарлайды Cауда және интеграция министрлігінің баспасөз қызметі.
Сатып алушылар арасында ең жоғары сұранысқа ие болған тауар санаттары:
- желі жабдықтары – +223% (ақшалай мәнде);
- бау-бақша техникасы – +134%;
- автокөлік электроникасы – +114%;
- балалар тағамы – +101%;
- асүйге арналған техника – +13%.
Акция барысында ең көп сатылған тауарлар қатарына мыналар кірді:
- шырынсыққыштар (сұраныс 18 есе артқан);
- смартфондар (10 есе);
- бау-бақша техникасы (электр аралар мен қар тазалайтын машиналар – 7 есе);
- спорттық аксессуарлар (4 есе);
- сымсыз шаңсорғыштар (2 есе).
Сатып алуда ең белсенді өңірлер қатарында Алматы, Қарағанды, Астана, Павлодар, сондай-ақ Ақмола және Шығыс Қазақстан облыстары бар.
«Береке Fest» акциясы Қазақстан Республикасы Сауда және интеграция министрлігінің бастамасымен 2025 жылғы қыркүйек айының соңында басталған болатын. Бүгінде бұл акцияға еліміздің 80-нен астам ірі сауда желілері қатысуда. Қазан айының ортасында аталған бастамаға Wildberries, Kaspi, Teez сынды ірі онлайн платформалар қосылып, акцияның ел аумағындағы қамту ауқымын кеңейтуге және отандық бизнесті қолдауға мүмкіндік берді.
