Шығыс Қазақстан облысында 18 шілдеде қол қойылған және 2026 жылдың 1 қаңтарынан бастап күшіне енетін жаңа Салық кодексіндегі өзгерістерге арналған брифинг өтті. Жаңартулар ашықтықты арттыруға, процестерді цифрландыруға және кәсіпкерлік үшін неғұрлым қолайлы жағдайлар жасауға бағытталған, деп хабарлайды F16.kz тілшісі.
Өңірлік коммуникациялар қызметінде өткен брифинг барысында ШҚО бойынша Мемлекеттік кірістер департаментінің жанама салықтарды әкімшілендіру басқармасының басшысы Асхат Жибитаев негізгі жаңалықтарды таныстырды.
Белгілі болғандай, 2026 жылдан бастап ҚҚС мөлшерлемесі 16%, міндетті тіркеу үшін шекті 10 мың АЕК-ті құрайды. Медицина үшін төмендетілген мөлшерлемелер енгізілді. Атап айтсақ, медициналық қызметтерге, дәрі-дәрмектерге және медициналық бұйымдарға 2026 жылы 5%, ал 2027 жылы 10% мөлшерлемесі қарастырылған.
Құрылыс саласында тұрғын үй-жайларды сату және жалға беру кезінде ҚҚС-тан босату жойылады. Құрылысы 2026 жылғы 1 қаңтарға дейін басталған немесе аяқталған объектілер үшін салық салудың жеңілдетілген тәртібі сақталады.
ҚҚС-тан босатылған қызметтер – ішкі туризм, отандық кітаптарды басып шығару және археологиялық жұмыстар тізбесі кеңейтілді. Экспорттық айналым күнін анықтау және ҚҚС қайтару тәртібі жеңілдетілді, тексеру жүргізу мерзімі қысқартылды.
2026 жылдан бастап резидент еместердің қызметтері бойынша электрондық шот-фактуралардың міндетті көшірмесі енгізіледі, бұл салық есептілігін толтыруды автоматтандыруға мүмкіндік береді. Сондай-ақ, ҚҚС-пен күмәнді мәмілелерді болдырмауға бағытталған «е-Тамга» сервисі арқылы ЭШФ-ны бақылаудың жаңа жүйесі енгізілуде.
Акциздер бөлігінде алкоголь және темекі өнімдеріне мөлшерлемелерді ұлғайту, сондай-ақ энергетикалық сусындарға акцизді енгізу көзделген – 2030 жылға қарай кезең-кезеңмен 240 теңгеге дейін өсумен 2026 жылы литріне 100 теңгеден бастап.
Брифингте ШҚО МКД мамандары акцизделетін тауарлардың заңсыз айналымының жолын кесу бойынша жұмыс нәтижелері туралы хабарлады. Олардың айтуынша, бір жыл ішінде 565 мыңнан астам қорап темекі өнімдері, 12 мың литрден астам алкоголь және 1 мың тоннадан астам мұнай өнімдері тәркіленді. Анықталған фактілер бойынша салынған айыппұлдар мөлшері 34 миллион теңгеден асты.
Тұтынушыларды қорғау үшін тауарлардың түпнұсқалығын тексеруге және бұзушылықтар туралы хабарлауға мүмкіндік беретін «Naqty Onim» мобильді сервисі ұсынылған.
