Шығыс Қазақстан облысының аумағында жүргізілген әуе бақылауы кезінде сирек кездесетін және жойылып кету қаупі бар балықтарды заңсыз аулау дерегі тіркелді, деп хабарлайды F16.kz.
Биыл 20 қарашада ШҚО орман шаруашылығы және жануарлар дүниесі аумақтық инспекциясы мамандары Қазәуеорманқорғау, Зайсан–Ертіс облысаралық бассейндік балық шаруашылығы инспекциясы және орман мен аңшылық шаруашылығының жедел тобының қызметкерлерімен бірлесіп, Ұлан, Самар, Күршім, Марқакөл және Катонқарағай аудандарының мемлекеттік орман қоры мен резервтік аңшылық шаруашылықтарында табиғатты қорғау талаптарының сақталуын тексеру мақсатында әуе арқылы рейд ұйымдастырды.
Рейд барысында Катонқарағай ауданына қарасты Коробиха ауылдық округі аумағында, Бұқтарма өзені маңында жойылу қаупі бар таймень балығын заңсыз аулау дерегі анықталды. Аталған фактіге қатысты материалдар толық жинақталып, әрі қарай тексеру жүргізу үшін Катонқарағай ауданының полиция бөліміне жолданды, – деп мәлімдеді ШҚО орман шаруашылығы және жануарлар дүниесі аумақтық инспекциясы.
