Шығыс жұртына таусылмас рухани азық сыйлаған «Туған жер – алтын бесігім» жобасы аяқталды. Өскемендегі облыстық филармонияда бірнеше айға жалғасқан өнер жәрмеңкесінің қорытынды гала-концерті болды. Өңірдің аудан-қалаларынан келген кіл мықтылар көрерменге саф өнердің мәйегін ұсынды. Ал сахнада жарқыраған үздіктердің ішінен үздік шықққан Күршім ауданының шығармашылық ұжымы бас бәйгені еншіледі, деп хабарлайды F16.kz.
Гала-концертке келген адамның қарасы тым көп болды. Залда ине шаншыр орын жоқ. Әр апта сайын ән-жырға сусындап әдеттеніп қалған өскемендіктер мен қала қонақтарын айтпағанда, облыстың түкпір-түкпірінен өнерпаздарына арнайы қолдау көрсетуге келгендер де аз емес.
Шығысымыздың төрінде сән-салтанаты жарасқан керемет кеш өтті. Соңғы 3 айда әр аптаның жұмасында өнерсүйер қауым осы концерт залына асыға келіп жүрді. Рухани, мәдени демалыс сыйлап, халықтың шөліркеп қалған көңілін сусындатқан барлық өнерпаздарға алғыс білдіремін!- деді облыс әкімі Нұрымбет Сақтағанов.
Қорытынды концерттің бір ерекшелігі – аймақтың қала-аудандарынан келген шығармашылық ұжымдар бір-бір нөмірден ұсынды. Облыстық филармония әртістері де сахнаға шығып, көрерменге көтеріңкі көңіл күй сыйлады.
Бұл кештің апогейі үш ай бойы өнер додасының көрігін қыздырған ұжымдарды марапаттау болды. Сонымен жүлделі үшінші орынды Марқакөл ауданы иеленсе, екінші орын Ұлан ауданына бұйырды. Бірінші орынға Тарбағатай ауданы лайық деп танылды. Ал «Туған жер – алтын бесігім» жобасының гран-приін Күршім ауданының өнерпаздары жеңіп алды. Бас жүлдеге облыс әкімдігі атынан 15 млн теңге ақшалай сыйлық табыс етілді.
