2026 жылғы 1 қаңтардан бастап Қазақстан азаматтары жеке куәлікті алғаш рет алған кезде және оны жарамдылық мерзімі аяқталуына байланысты ауыстырғанда мемлекеттік баж салығын төлемейді, деп жазды Polisia.kz.
Ішкі істер министрлігінің бастамасымен қолға алынған бұл тәжірибе құжат алу рәсімін жеңілдетіп, азаматтардың қаржылық жүктемесін азайтуға бағытталған.
Алғаш рет берілетін жеке куәліктер тегін болады. Сонымен қатар жеке куәлік мерзімі аяқталған жағдайда оны ауыстыру кезінде де мемлекеттік баж алынбайды, – деді ІІМ Көші-қон қызметі комитетінің төрағасы Аслан Аталықов.
Сонымен қатар ол елімізде халықты құжаттандырудың бірыңғай жүйесі жұмыс істеп тұрғанын атап өтті. Бұл жүйе арқылы азаматтарға жеке сәйкестендіру нөмірі (ЖСН) беріледі, жеке куәлік пен паспорттар рәсімделеді, сондай-ақ азаматтарды тіркеу (тұрғылықты мекенжай бойынша тіркеу) жүзеге асырылады.
Айта кетейік, Ішкі істер министрлігі құжаттандыру ісінде цифрландыруды белсенді енгізе бастады. Қазір паспорттарды тек ел ішінде емес, шетелде де электронды түрде рәсімдеуге болады. Бұл қызмет 71 елдегі 99 шетелдік мекемеде іске асырылған. Шетелде жүрген қазақстандықтар енді паспортты бұрынғыдай 6 ай күтпей, небары 30 күнде ала алады.
