Жыл басынан бері еліміздің 14 өңірінде 32 спорт нысаны пайдалануға берілді. Ал жыл соңына дейін тағы 70 нысанның құрылысын аяқтау жоспарланған, деп хабарлайды F16.kz тілшісі Туризм және спорт министрлігіне сілтеме жасап.
Жаңа нысандарда бокс, баскетбол, волейбол, футбол, күрес, үстел теннисі және өзге де спорт түрлерімен айналысуға мүмкіндік бар.
Биыл пайдалануға берілетін нысандар қатарында үздіксіз білім беретін Ұлттық спорт университетін ерекше атап өтуге болады. Университет инфрақұрылымына стадион, жабық жеңіл атлетика манежі, олимпиадалық бассейн, спорт кешені, ғылыми-зерттеу және медициналық қалпына келтіру орталықтары кірмек.
Сонымен қатар, елімізде бұқаралық спортты дамыту мәселелеріне ерекше назар аударылуда.
– 2024 жылғы деректерге сәйкес, ел халқының 40%-дан астамы тұрақты түрде спортпен шұғылданады. 1 мың адамға шаққанда спорт инфрақұрылымымен қамту деңгейі 55%-дан асты. Ел тұрғындарының салауатты өмір салтын ұстануға, спортпен шұғылдануға деген қызығушылығының, заманауи спорт нысандарына деген сұраныстың артуына байланысты бұл көрсеткішті 2029 жылға дейін 65%-ға жеткізу жоспарланып отыр, – деп хабарлайды Туризм және спорт министрлігінің баспасөз қызметі.
