Өскеменде шайбалы хоккейден жастар арасында «Қысқы спорт фест» турнирі аяқталды. Б.Александров атындағы спорт сарайын екі күн бойы дүбірге бөлеген сайыстың жеңімпаздары мен жүлдегерлерін ШҚО әкімі Нұрымбет Сақтағанов пен облыс прокуроры Тимур Сүлейменов марапаттады, деп хабарлайды F16.kz.
Салауатты өмір салтын насихаттау, бұқаралық спорттың дамыту және жас таланттарды қолдауды мұрат еткен жарыстың өтуіне аймақ басшылығы мен облыс прокуратурасы мұрындық болды.
Кешелі бері қаламызда тамаша спорт фестивалі өтіп жатыр. Заң және тәртіп идеологемасы аясында қолға алынған бұл игі шараның негізгі мақсаты – спорт арқылы жастарды жағымсыз әрекеттерден сақтандыру. Екі күнге созылған турнир барысында қатысушылар өздерінің спорттық шеберлігін ғана көрсеткен жоқ, бір-біріне деген құрметін, сыйластығын паш етті. Ең бастысы сайыс әділ әрі достық пейілде өтті, – деді аймақ басшысы Нұрымбет Сақтағанов.
Спорт фестивалін ұйымдастыруға қаланың бірқатар кәсіпорны демеушілік етті. Облыс орталығында тұрғын үйлер мен әлеуметтік нысандар салған AN group құрылыс компаниясының өкілі Әсел Исаханова өскелең ұрпақтың салауатты болып қалыптасуы ел болашағын қалыптастырудағы маңызды фактордың бірі деп атап өтті.
Біздің компания спортпен айналысатын жастарды үнемі қолдайды. Еліміздің болашағы салауатты, білімді жастардың қолында. Осындай шараға демеушілік етуге сенім білдіргені үшін рахмет айтамын, – деді ол.
Турнирге екі жас ерекшелігі бойынша (2008–2010 жж. және 2012–2014 жж. туғандар) сегіз команда қатысып жатыр. Олардың қатарында «Торнадо», «Локомотив», «Титан», «Устинка», «Ульбинка», «Кедр» және «КШТ» командалары бар.
Жарыстың бас фавориті саналған өскемендік «Устинка» құрама командасы жанкүйерлер сенімін ақтап, турнир чемпионы атынды. Жеңімпаз команданың құрамында қаладағы №№9, 19, 12 мектептердің оқушылары ойнады.
Жарысқа тыңғылықты дайындалды. Қаладағы хоккей модулінде, спорт сарайында, сондай-ақ даладағы мқз айдынында жаттығу өткіздік. Сол төккен тер мен еңбектің нәтижесі деп айтуға болады, міне бүгін чемпион атанып отырмыз, – деді «Устинканың» бас бапкері Павел Гарбузов.
