Елімізде күзгі әскерге шақыру науқаны басталды. Бұл туралы Қазақстан Республикасы Президенті жанындағы Орталық коммуникациялар қызметінде өткен брифингте Қорғаныс министрлігі хабарлады, деп жазады F16.kz.
Биылғы науқанның ерекшеліктері туралы ҚР Қарулы күштері Бас штабы Ұйымдастыру-жұмылдыру жұмыстары департаменті бастығының орынбасары, полковник Фархат Айдарбаев айтып берді.
Оның мәлімдеуінше, ағымдағы жылдың 1 қыркүйегі мен 30 желтоқсаны аралығында шамамен 22 мың жас әскер қатарына шақырылады. 18 бен 27 жас аралығындағы азаматтар Қарулы күштердің, Ұлттық ұланның, ҰҚК Шекара қызметінің, Төтенше жағдайлар министрлігінің және Мемлекеттік күзет қызметінің қатарын толықтырады.
– Шақыру науқанын ұйымдастыру үшін жергілікті атқарушы органдардың шешімімен 195 шақыру комиссиясы құрылды. Оларға аудан, облыс және республикалық маңызы бар қала әкімдерінің орынбасарлары төрағалық етеді, – деді Қорғаныс министрлігінің өкілі.
Полковник Фархат Айдарбаев әскери-патриоттық тәрбие, әскери қызмет және жекелеген орталық мемлекеттік органдардың функцияларын қайта бөлу мәселелері бойынша заңнамаға енгізілген өзгерістерге тоқталды. Оның айтуынша, бұл толықтырулар 16 шілдеде күшіне енді. Олар есепке алу мен шақыру жүйесінде цифрлық әдістерді заң жүзінде бекітіп, жергілікті әскери басқару органдарының жұмысын оңтайландыруға мүмкіндік береді.
Қорғаныс министрлігінен хабарлағандай, енді SMS-хабарламалар арқылы жеткізілген шақырулар ресми түрде заңды ескерту әдісі болып саналады. Сонымен бірге, шақыру туралы ақпарат «электрондық үкімет» веб-порталындағы жеке кабинетке де орналастырылады. Мұнымен бірге қағаз нұсқадағы шақыру да тұрақты тіркеудегі жеріне, уақытша тұру немесе жұмыс орнына жеткізіледі. Сондай-ақ шақыру қағазын азамат жергілікті әскери басқару органына келіп те ала алады.
Министрлік өкілі жылдың басынан бастап ішкі көші-қон кезінде азаматтарды әскери есепке автоматты түрде тіркеу механизмі енгізілгенін еске салды. Бұл рәсімді азаматтың өзін қатыстырмай-ақ жүзеге асыруға болады. Қазірдің өзінде аталмыш мүмкіндікті 250 мыңға жуық адам пайдаланған.
– Сондай-ақ 17 жастағы азаматтарды әскери есепке қою да проактивті форматқа ауыстырылған. Бұл деректер «электрондық үкімет» порталы арқылы тіркеледі. Осы жүйе арқылы әскерге шақырудан кейінге қалдыру немесе босату туралы мемлекеттік қызмет көрсетіледі. Бұған оқуы, бір немесе бірнеше баланың болуы, ауылдық жерде мұғалім немесе дәрігер болып жұмыс істеуі және ғылыми дәрежесінің болуы негіз болып саналады, – деп жазады министріліктің баспасөз қызметі.
Сонымен қатар әскери қызметшілер мен әскери борышын өтеген азаматтарға арналған әлеуметтік кепілдіктер де заң жүзінде бекітілді. Бүгінде 2 100-ден астам сарбаз жауынгерлік дайындықта жоғары нәтиже көрсетіп, мемлекеттік білім гранты бойынша оқуға мүмкіндік алды. Бұған қоса 20 мыңнан астам әскери қызметші жалпы сомасы 8 миллиард теңгеге кредиттік демалыс алу құқығын пайдаланған.
