Қазақстандық блогерлер Ерболат Жанабылов пен Эльмира Төлегенова заңсыз ұтыс ұйымдастырып, адамдардан 247,5 млн теңге жинаған. Қаржылық мониторинг агенттігінің Астана қаласы бойынша департаменті сотқа дейінгі тергеп-тексеруді аяқтады. Олар заңсыз кәсіпкерлікпен айналысып, қылмыстық жолмен алынған табысты заңдастырды деген күдікке ілінген, деп хабарлайды F16.kz.
Тергеу деректеріне сәйкес, Instagram желісінде 15 миллионнан астам жазылушысы бар ерлі-зайыпты блогерлер 2025 жылы онлайн курстар сатамыз деген желеумен заңсыз схема құрған. Негізгі мақсат – қымбат сыйлықтар ұтысына қатысу болған.
Ұсынылған «курстардың» басым бөлігі ашық дереккөздерден алынған, нақты білім беру құндылығы болмаған. Тергеу оларды заңсыз лотерея қызметін жасыру үшін пайдаланылған деп отыр.
Жүлде қоры қатысушылардың жеке қаражатынан емес, курсқа төленген ақшадан жиналған. Сонымен қатар электронды «сәттілік барабанының» параметрлері өзгертіліп, арзан жүлделердің ұтып алу мүмкіндігі әдейі арттырылған, ал қымбат сыйлықтардікі төмендетілген.
Электронды «сәттілік барабанының» параметрлерін өзгерту фактілері анықталды, соның салдарынан 5 000 теңгелік жүлдені ұтып алу ықтималдығы жасанды түрде арттырылып, ал құнды жүлделерді ұтып алу мүмкіндігі едәуір төмендетілген, — деп жазды ҚМА баспасөз қызметі.
Күдіктілер ең көп репост жасаған қатысушыға автокөлік берілетінін жариялағанымен, іс жүзінде жеңімпаз анықталмаған және сыйлық табысталмаған. Соның салдарынан азаматтардан Zhana Business ЖШС-ға қарасты шоттарға 247,5 млн теңге түскен. Оның 60 млн теңгесі депозитке салынған.
Сот санкциясымен 17 iPhone, сондай-ақ Lamborghini Urus пен Lexus LX 600 маркалы көліктерді қоса алғанда жиыны 10 автокөлікке тыйым салынды. Күдіктілерге үйқамақ түріндегі бұлтартпау жазасы берілді.
ҚР ҚПК-нің 201-бабына сәйкес өзге ақпарат жарияланбайды.
