Елімізде адамның жеке шекарасын бұзып, оны еркінен тыс бақылауға алуға тырысқандар қылмыстық жауапкершілікке тартылады, деп хабарлайды F16.kz.
Енді сталкингпен айналысқандар тек айыппұлмен шектелмей, қамауға да алынуы мүмкін.
Ішкі істер министрлігінің мәлімдеуінше, жақында қабылданған «Қазақстан Республикасының кейбір заңнамалық актілеріне қылмыстық заңнаманы оңтайландыру мәселелері бойынша өзгерістер мен толықтырулар енгізу туралы» заңы – азаматтардың қауіпсіздігін арттыруға бағытталған маңызды құқықтық қадам.
Жаңа заңға сәйес, сталкинг жасағандарға 200 айлық есептік көрсеткішке дейін (шамамен 800 мың теңге) айыппұл салынады немесе қоғамдық (200 сағатқа дейін) не түзету жұмыстарына тартылады. Кейбір жағдайларда 50 тәулікке дейін қамауға алу жазасы да қарастырылған.
Бұған дейін Бас прокуратура сталкингті қандай белгілер арқылы тануға болатынын және мұндай жағдайда азаматтар қайда жүгінуі қажет екенін түсіндірген.
Статистикаға сүйенсек, елімізде адам қолынан қаза болған әйелдердің 76 пайызы кезінде сталкинг құрбанына айналған. Бұл дерек жаңа заңның өзектілігін көрсетіп отыр және қоғамда жиі кездесетін мәселелердің бірімен күресу үшін қабылданғанын айқындайды.
Сталкинг деген, күш қолданбай, бірақ үнемі қайталанатын психологиялық қысым мен қудалау әрекеттері. Бұл адамның моральдық жағдайына кері әсер етіп, күйзеліске әкелуі мүмкін. Оған еркінен тыс аңду, үнемі хабарласу, интернет арқылы бақылау, адамның жеке өміріне заңсыз араласу және тағы басқа жағдайлар жатады.
