Кейінгі кезде елде өздерін банкрот деп жариялап, қарызды өтеуден құтылған жеке кәсіпкерлер мен компаниялар көбейген. Қаржы министрлігі мемлекеттік кірістер комитетінің өкілдері мұндай әрекет жазасыз қалмайтынын ескертті, деп хабарлайды F16.kz порталы «Қазақ телеграф агенттігіне» сілтеме жасап.
Заңға сүйенсек, қасқана банкроттық – құрылтайшының, лауазымды тұлғаның немесе жеке кәсіпкердің мүлікті жасыру, иеліктен шығару немесе басқа да әдістер арқылы кредитор алдындағы міндеттемелерін орындаудан жалтаруы болып саналады. Бұған жалған мәмілелер жасау, активтерді шығару, қарыздарды жасанды көбейту, басқару мен есепке алу жүйесін бұзу және басқа заңсыз әрекеттер кіреді.
Егер әдейі банкроттық дәлелденсе, сот арқылы жауапқа тартылып, компания қарыздары жеке қаражат есебінен өтелуі мүмкін. Әкімшілік немесе қылмыстық тергеу нәтижесі бойынша кінәлі деп танылған тұлға банкроттық рәсімі аяқталғаннан кейін де жауапкершілікке тартылуы мүмкін.
2024–2025 жылдары банкроттық рәсіміндегі барлық борышкердің қызметін талдау барысында 120 әкімшілік іс қозғалып, 44-тен астам қылмыстық іс тіркелді. Мысалы, Жамбыл облысында бір компания директоры 2024 жылы әдейі банкроттық жасағаны үшін сот арқылы кінәлі деп танылып, 2025 жылы кредиторлар пайдасына 45 млн теңгеден астам қаражат өндірілді.
Ведомство мамандары атап өткендей, тек 2025 жылы кінәлі тұлғаларға қатысты 12-ден астам сот шешімі шыққан. Қаржы органдары банкроттықты автоматтандырылған құралдар арқылы бақылайтын жүйе енгізіп, мәмілелер мен компаниялардың қаржылық жағдайын талдауды күшейтпек.
