Бүгін Шығыс Қазақстан облысы бойынша Әдеп жөніндегі кеңесте қызметтік әдеп нормаларын бұзған басқарма басшысының мәселесі қаралды. Бұл туралы облыс әкімінің баспасөз қызметі мәлім етті, деп хабарлайды F16.kz.
Кеңес мүшелерінің дауыс беру нәтижесінде әкімдік қызметкеріне қатаң сөгіс түріндегі тәртіптік жаза қолдану туралы шешім қабылданды. Облыс әкіміне тиісті шара қабылдау туралы ұсыныс жолданды.
Бұған дейін аталған басқарма басшысы көпшілік алдында кешірім сұраған болатын. Сонымен қатар бүгін Әдеп жөніндегі кеңес мүшелерінің алдында өз қателігін мойындап, сол онлайн жиналысқа қатысқан әріптестерінен тағы да кешірім сұрады.
Айта кетейік, бұл мемлекеттік қызметші 18 жыл бойы мемлекеттік қызмет саласында еңбек етіп келеді және алғаш рет тәртіптік жауапкершілікке тартылып отыр.
Қызметкер мас күйде болуы мүмкіндігі туралы пікірлерге қатысты келесіні хабарлаймыз: ол ІІ типті қант диабеті диагнозымен есепте тұрады. Яғни, бұл сырқаты оның физикалық жағдайына әсер етуі мүмкін. Өзі бұл деректі растайтын медициналық комиссияның қорытындысын ұсынуға дайын екенін білдірді, – делінген әкімдіктің баспасөз қызметі таратқан ақпаратта.
Шығыс Қазақстан облысының әкімдігі ашықтық, мемлекеттік қызметтегі әдеп пен заң талаптарын бұзушылыққа мүлде төзбеушілік қағидатын берік ұстанады. Мемлекеттік қызметшілерге қатысты тәртіптік істер қатаң түрде заңнама талаптарына және объективтілік қағидаттарына сәйкес жүргізіледі.
Естеріңізге сала кетейік, бұған дейін біз аталған басқарма басшысына қатысты қызметтік тергеу басталғаны туралы жазғанбыз.
