Моңғолия астанасы Ұлан-Батыр қаласында бокстан Азия чемпионатының ерлер арасындағы финалдық жекпе-жектері аяқталды. Жарыс қорытындысы бойынша Қазақстан құрамасының қоржыны тағы бір алтын медальмен толықты. Аса ауыр салмақта (90+ кг) сынға түскен Айбек Оралбай финалда Қытай өкілі Данабек Байқоныспен кездесіп, айқын басымдықпен жеңіске жетті. Төрешілер шешімі бойынша кездесу 5:0 есебімен қазақстандық боксшының пайдасына аяқталды, деп хабарлайды F16.kz.
Бұл жеңіс Айбек Оралбай үшін Азия чемпионаттарындағы кезекті жетістік болып отыр. Ол бұған дейін де құрлықтық додада екі мәрте алтын медаль жеңіп алған (2022 және 2024 жылдары). Осылайша, Ұлан-Батырдағы жеңіс оның мансабындағы үшінші Азия чемпионы атағын әкелді.
Жалпы есепте Қазақстанның ерлер құрамасы Азия чемпионатын табысты аяқтады. Команда қоржынында төрт алтын, бір күміс және үш қола медаль бар.
Алтын жүлдегерлер қатарында Нұрбек Оралбай, Сабыржан Аққалықов және Оразбек Асылқұлов бар. Күміс медальды Төрехан Сабырхан иеленсе, қола жүлде Махмұд Сабырхан, Ертуған Зейнуллинов және Сағындық Тоғамбай еншісіне тиді.
Әйелдер құрамасы да жарысты жоғары деңгейде аяқтады. Финалдық кезеңде Надежда Рябец пен Дина Исламбекова алтын медаль жеңіп алса, Бақыт Сейдіш күміс жүлдегер атанды. Ал Айгерім Сәттібаева мен Валентина Хальзова қола медаль иеленді.
Осылайша, Қазақстан құрамасы Азия чемпионатын жоғары нәтижемен аяқтап, халықаралық аренадағы өз үстемдігін тағы бір мәрте дәлелдеді.
