Еңбек келісімшартында тыйым салынғанына қарамастан «Ақтөбе» футбол клубының ойыншылары 110 млн теңгені бәске тіккен. Осы және өзге де бұзушылықтарды еліміздің Бас прокуратурасы анықтады, деп хабарлайды F16.kz.
Бұл туралы бас прокурор Берік Асыловтың мәжіліс депутаты Абзал Құспанның депутаттық сауалына берген жауабында айтылған.
Қазақстан Республикасы Бас прокуратурасы Қазақстан футбол федерациясы мен отандық бірнеше футбол клубына тексеру жүргізіп, келісілген матчтарды ұйымдастыру және ойыншылардың букмекерлік кеңселерге бәс тігуіне қатысты заң бұзылғанын анықтады. Дәлірек айтқанда, «Ақтөбенің» тоғыз футболшысы жалпы сомасы 110 миллион теңгеге бәс тіккені белгілі болды. Тексеру қорытындысы бойынша, 2025 жылғы 2 сәуірде прокуратура жауапты федерацияға заңбұзушылықтарды жою туралы ұсыныс енгізді. Жауап ретінде федерация аудит, қаржы және этика комитетін құрып, қаржылық тәртіпті күшейтуге бағытталған 33 іс-шараны қамтитын «жол картасын» әзірледі.
Биыл 20 мамырдағы жағдай бойынша федерация əкімшілігінің басшысымен, басқарушы директормен, заң, операциялық жəне маркетинг департаменттерінің директорларымен, қауіпсіздік жəне интегрити қызметінің басшысымен еңбек шарты бұзылды. Сондай-ақ федерацияның бірқатар басшы қызметкері лауазымынан төмендетілді, – деп жазылған Бас прокуратураның жауабында.
Қазір федерация заң бұзушылықтарды жою, қаржылық тəртіпті күшейту жəне футболды дамытудың жаңа мақсаттары мен міндеттеріне сай ұйымдық құрылымын оңтайландыру жұмыстарын жетілдіріп жатыр.
Бұдан кейін UEFA тарапынан «Ақтөбе» клубы қатаң санкцияға ұшырауы мүмкін. Ақтөбе барлық еурокубоктардан шеттетіліп, 2 жылға бан алуы ғажап емес. Онымен бірге қазір Чемпиондар лигасында ойнап жүрген Қайрат та қатаң тексерілуі ықтимал. Ақтөбе ойыншыларының бұл әрекеті бүкіл Қазақстан футболына салқынын тигізеді.
Айта кетейік, Қазақстан жан басына шаққанда келісілген матчтары ең көп мемлекет ретінде әлемдік антирейтингте көш басында тұр.
