Алатау қаласы еліміздің жаңа іскерлік және инновациялық орталығы болады. Бұл туралы Мемлекет басшысы Қасым-Жомарт Тоқаев бүгінгі халыққа Жолдауында айтты, деп хабарлайды F16.kz.
Жалпыұлттық маңызы бар осы жобаны жүзеге асыру үшін арнайы жер бөлініп, бастапқы жоспарлау жұмысы аяқталды, инфрақұрылымның негізгі желілері қосылды.
Жақында Қытайға барған сапарымда әлемнің жетекші компанияларымен құны миллиардтаған қаржы тұратын келісімдер жасалды. Шэньчжэнь жаһандық технополисін салуға қатысқан сондай компанияның бірі енді Alatau City жобасын жүзеге асыруға тікелей атсалысады, – деді Президент.
Сонымен қатар мемлекет басшысы Алатау қаласына Үкіметке тікелей бағынатындай арнайы мәртебе беру қажеттігін атап өтті. Содан кейін көп ұзамай жеке заң қабылданады.
Құжатта қаланы басқару режимі, оның қаржылық моделі және басқа да маңызды мәселелер қамтылуға тиіс. Арнайы құқықтық мәртебе – қалаға берілетін артықшылық емес, жобаның қағаз жүзінде қалып қоймай, нақты іске асуына қажетті шара немесе құрал екенін айта кеткен жөн, – деп түсіндірді Қасым-Жомарт Тоқаев.
Alatau City аймақтағы толық цифрланған алғашқы қалаға айналады. Мұнда Smart City технологияларын қолданудан бастап тауарлар мен қызмет ақысын криптовалютамен төлеуге дейінгі жаңалықтың барлығы енгізілмек. Бұл қала Қазақстанның келешектегі келбетін танытпақ. Онда технологиялық өрлеуге және өмір сүруге барынша қолайлы жағдай жасалады.
