Қазақстанда ауылдар қаңырап бос қалып, қалалардың аумағы кеңейіп жатыр. Бүгінде ел халқының 63,3 пайызы қалада тұрады. Осыдан он жыл бұрын бұл көрсеткіш 56,3 пайыз болған, деп хабарлайды F16.kz.
Finprom.kz сарапшыларының есебіне сүйенсек, кейінгі бір жылда елімізде халық саны 228,1 мың адамға (+1,1%) көбейген. Бірақ одан ауылдар емес, Алматы мен Астана сияқты мегаполистер ғана ұтқан. Айталық, осы уақыт аралығында оңтүстік астананың халқы 61,6 мың адамға көбейсе, елорда тұрғындары 80,4 мыңға артқан.
Солтүстік Қазақстан, Абай және Жетісу облыстарында керісінше халық саны кеміп жатыр. Бір жыл ішінде солтүстіктен 8,1 мың адам көшіп кетсе, Абай облысынан 6,4 мың, Жетісудан 5,7 мың адам басқа жаққа қоныс аударған. Бір қызығы бұл өңірлерден ірге көтерген отбасылар Алматы мен Астанаға табан тіреген.
Бүгінде Қазақстан халқының 63,3 пайызы қалада тұрып жатыр. Салыстыру үшін айтайық, осыдан 10 жыл бұрын бұл көрсеткіш 56,3 пайыз болған. Сарапшылардың болжамынша, бұлай жалғаса берсе алдағы 10 жылда қала тұрғындарының үлесі 70 пайызға жетіп жығылады. Сарапшы Данияр Кумпековтің айтуынша, ауылдан адамдардың көшуі болашақта азық-түлік қауіпсізлігіне үлкен соққы болмақ.
Біріншіден, әлеуметтік қауіп-қатер туралы ойлану керек. Қалаларда инфрақұрылымға, мектептер мен ауруханаларға жүктеме артып жатыр. Керісінше, ауылдық елді мекендер босап қалуда. Екіншіден, экономикалық қауіп бар. Алдағы 10–15 жылда ауыл шаруашылығында еңбек ететін адам қалмағандықтан азық-түлікті бұрынғыдан да көп мөлшерде импорттауға мәжбүр боламыз ба деп қауіптенемін, – деді ол.
