Ішкі істер министрлігі ұйымдасқан қылмысқа қарсы күрес басқармасының қызметкерлері Алматы, Шымкент қалаларында, сондай-ақ Алматы, Батыс Қазақстан және Түркістан облыстарында әлеуметтік жағдайы нашар адамдардың атына автонесие рәсімдеп, кейін көліктерді шетелге шығарып отырған қылмыстық топтың жолын кесті, деп хабарлайды F16.kz порталы Polisia.kz-ке сілтеме жасап.
Тергеу барысында күдіктілер қысым көрсету және қорқыту арқылы азаматтарды өз атына автонесие рәсімдеуге мәжбүрлегені белгілі болды. Төлем қабілеті бар екенін көрсету үшін күдіктілер азаматтардың банк шоттарын уақытша толықтырып, олардың кредит тарихын қолдан жақсартқан. Жалған құжаттар пайдаланып, автокөліктерді кепілге қойып, микроқаржы ұйымдарынан несие алған. Осыдан соң қымбат автокөліктер шетелде сатылған. Қазір осындай 15 дерек анықталып, өзге де эпизодтар бойынша жұмыс жүргізіліп жатыр.
Тінту іс-шаралары барысында бірнеше атыс және суық қару, оқ-дәрілер, сондай-ақ қылмыстық әрекеттерді растайтын құжаттар мен ақпарат тасымалдағыштар тәркіленді. Сотқа дейінгі тергеп-тексеру бірнеше бап бойынша жүргізіліп жатыр, негізгі алты күдікті уақытша ұстау изоляторына қамалды.
