ШҚО полиция департаментінің қызметкерлері Алматы қаласы полиция департаментіндегі әріптестерімен бірлесіп, тыйым салынған психотроптық заттар сататын интернет-дүкен курьерлерінің жолын кесті, деп хабарлайды F16.kz.
Алматы қаласында жедел-іздестіру іс-шараларын жүргізу барысында есірткі таратумен айналысқан 20 жастағы бойжеткен ұсталды. Жеке тінту кезінде одан изолентамен оралған, ішінде ұнтақ тәрізді заты бар 36 түйіншек табылып, тәркіленді.
Мамандардың қорытындысына сәйкес, тәркіленген зат жалпы салмағы 20 грамнан асатын мефедрон болып шықты.
Өскемен қаласы полиция басқармасының есірткі қылмысына қарсы іс-қимыл бөлімінің қызметкерлері жалдамалы пәтерде тұрып, есірткі заттарын таратумен айналысқан 30 жастағы ер адамды ұстады. Оны тінту барысында ұнтақ тәрізді заты бар 12 түйіншек, сондай-ақ телефон тәркіленді. Пәтерді тінту кезінде қосымша тағы бес телефон табылды. Зерттеу нәтижелері бойынша тәркіленген заттың жалпы салмағы 20 грамнан асатын “a-PVP” психотроптық заты екені анықталды, — дейді ШҚО ПД баспасөз қызметі.
Күдіктінің 2026 жылғы қаңтар айында Алматы қаласында Telegram мессенджері арқылы курьер-жасырушы болып жұмысқа орналасқаны анықталды. Наурыз айының басында куратордың нұсқауымен ол Өскеменге келіп, баспана жалдап, тыйым салынған заттарды таратумен айналысқан.
Қазіргі уақытта екі күдікті де уақытша ұстау изоляторына қамалды. Сотқа дейінгі тергеп-тексеру амалдары жүргізілуде.
Тәркіленген есірткі заттарының көлемі 20 грамнан асады және қолданыстағы қылмыстық заңнамаға сәйкес ірі мөлшерге жатады, бұл ауыр қылмыс ретінде сараланады.
Полиция есірткі заттарының заңсыз айналымы қылмыстық жауапкершілікке әкеп соғатынын еске салады.
