Моңғолияның Ұлан-Батыр қаласында өтіп жатқан Азия чемпионатында дәл қазір Қазақстан құрамасының үш боксшысы жүлдегер атанды. Оның екеуі алтын, біреуі күміс медаль, деп хабарлайды F16.kz.
Бүгін еліміздің ерлер құрамасынан бес боксшы финалдық кездесулерін өткізеді. Олар: Оразбек Асылқұлов (60 кг), Төрехан Сабырхан (70 кг), Сабыржан Аққалықов (75 кг), Нұрбек Оралбай (85 кг), Айбек Оралбай (90 кг жоғары) бар. Қазірге дейін аталған былғары қолғап шеберлерінің үшеуі өнер көрсетіп қойды
Үндістандық Сачин Сачинппен қолғап түйістірген Оразбек Асылқұлов алғашқы минуттан қарсыласына қысым жасап, соңғы раундта жеңісті жұлып алды. Қорытынды есеп – 3:2. Асылқұлов World Boxing аясындағы 2026 жылғы Азия чемпионатының чемпионы атанды.
Бұдан кейін шаршы алаңға Төрехан Сабырхан шықты. Қазақстандық боксшы финалда иорданиялық Зейад Ишаишпен қолғап түйістірді. Тартысты текетірістің тағдыры үшінші раундта шешіліп, 5:0 есебімен Зейад Ишаиш жеңімпаз деп танылды. Төрехан Азия чемпионатының күміс медалін қанағат тұтты.
Бүгінгі сессияда Қазақстан ерлер құрамасы сапында үшінші болып финалда өнер көрсеткен Сабыржан Аққалықов өзбекстандық Жавохир Абдурахимовты тас-талқан етіп жеңіп, алтын медальді еншіледі.
Бірінші раундта Сабыржан 4:1 есебімен алға шыққан, осы басымдығын екінші және үшінші раундтарда да сақтап, төрешілер шешімімен 5:0 есебімен жеңіске жетті.
Парижде өткен олимпиада ойындарында күмістен медаль таққан Нұрбек Оралбай да Моңғолия жеріндегі сары құрлық біріншілігінде аянып қалған жоқ. Талантты боксшы Қазақстанның көк туын тағы бір мәрте биікте желбіретті. Финалда өзбекстандық Жасурбек Юлдошевпен (Өзбекстан) жұдырықтасқан біздің жігіт 5:0 есебімен басым түсіп, алғаш рет Азия чемпионы атанды.
Енді Қазақстан құрамасы сапынан ақтық сында бір отандасымыз — Айбек Оралбай (+90 кг) қалды.
Бұдан бөлек, ерлер командасы сапындағы Махмұд Сабырхан (-55 кг), Ертуған Зейнуллинов (-65 кг) пен Сағындық Тоғамбайда (-90 кг) қола медаль бар. Ал еліміздің әйелдер құрамасы құрлықтық додада екі алтын, бір күміс, екі қола жүлдеге қол жеткізді. Атап айтқанда, Надежда Рябец (80 келі), Дина Исламбекова (80 келіден жоғары) Азия чемпионы атанса, Бақыт Сейдіш (70 келі) күміс жүлдеге қол жеткізді. Қола жүлде Әйгерім Сәттібаева (48 келі) мен Валентина Хальзоваға (70 келі) бұйырды.
