Глубокое ауданында шайбалы хоккей дәстүрі 1960—жылдардан бастау алады. Дәл осы өңірде құрылған «Ертіс» командасынан Қазақстан хоккейінің аты аңызға айналған өкілдері – Борис Александров пен Виктор Набоков өз жолын бастаған. F16.kz тілшілері даңқты хоккейшілерді түлеткен мекенде қысқы спорт түрлері қазір қалай дамып жатқанын көріп қайтты.
Бүгінде де ауданда хоккейге ерекше көңіл бөлінген. «Глубокое» және «ERTIS» командалары жыл сайын облыстық және республикалық жарыстарда жүлделі орындардан көрініп жүр. Соның айқын дәлелі ретінде 2025 жылы аудан құрамасының Евгений Поладьевті еске алуға арналған чемпионатта топ жарғанын айтуға болады.
КАПИТАН ҺӘМ ӘКІМ
Аудандық команданың капитаны әрі Глубокое кентінің әкімі Руслан Асановтың айтуынша, бұл – бірнеше буынның еңбегінің нәтижесі.
Бүгінде екі команда облыс біріншілігіне қатысып жүр. Біздің көптеген тәрбиеленушіміз «Торпедо», «Барыс» клубтарында, тіпті АҚШ-та да ойнап жүр. Барлығы да жолын балалар-жасөспірімдер спорт мектебінен бастап, жоғары деңгейге жетті. Ауыл үшін бұл – ұрпақ сабақтастығының айқын көрінісі. Оның үстіне біздің өңірде қыс алты айға созылады, сондықтан қысқы спорт түрлерін дамыту өте маңызды, – деді ол.
Ұрпақ сабақтастығы дегенде Руслан Асановтың әкесі – Ақылбек Асановты атап өтпеу мүмкін емес. Ол – 1980-жылдардан бері спорт саласында еңбек етіп келе жатқан тәжірибелі маман. Балаларының бойына спортқа деген сүйіспеншілікті әкесі сіңірген. Бүгінде Глубокое хоккей мектебінен шыққан танымал ойыншылар қатарында «Барыс» хоккей клубының шабуылшысы Руслан Оспанов, сондай-ақ «Торпедо» жастар командасының өкілдері Алан Асанов пен Артур Глухих бар.
72 ЖАСТАҒЫ ХОККЕЙШІ
Біздің ардагерлер жастарға арнап шеберлік сабақтарын өткізеді. Тактикалық әрі техникалық әдістерді іс жүзінде көрсетеді. Жастар үшін бәрін көзбен көріп, үйрену – ең тиімді жол. Бірге ойнап, тәжірибе алмасу арқылы олар әлдеқайда тез өседі, – деді ауданның спорт нұсқаушысы Ақылбек Асанов.
Ақылбек Асановтың айтуынша, 2025 жылы Прогресс ауылында жаңа хоккей корты ашылған. Бұл оның спорт саласында қызмет етіп жүрген кезеңдегі үшінші мұз айдыны. Бұрынғы екі мұз айдынын ол балалардың көмегімен салған. Қоршауы ағаштан жасалғандықтан уақыт өте келе жарамсыз болып қалған.
Бүгінде жаңа мұз айдыны ауыл тұрғындары жиылатын орталыққа айналды. Мұнда бастауыш сынып оқушыларынан бастап, ересектерге дейін келіп жаттығады.
Айта кетейік, аудандағы ең жасы үлкен хоккейші – 72 жаста. Соған қарамастан қария әлі күнге дейін мұзға шығып, хоккей ойнайды.
Глубокое ауданындағы хоккей – жай ғана спорт емес, ол – дәстүр, тәрбие және болашаққа бастар жол.
