«Алтай Өскемен» клубының Қазақстан Премьер-лигасына оралуы өңір спортына жаңа серпін берді. Дегенмен, жоғары деңгейдегі жарыста тұрақтап қалу үшін тек ойын нәтижесі емес, қаржыландыру, инфрақұрылым, кадр даярлау және жанкүйерлік мәдениетті қалыптастыру сияқты маңызды түйткілдер де ескерілуі қажет. Осы орайда клубтың қазіргі жағдайы, алдағы жоспары және шешілуге тиіс мәселелер туралы ШҚО денешынықтыру және спорт басқармасының басшысы Асқар Можанов айтып берді.
– «Алтай Өскемен» клубының жаңа маусымдағы мақсаты қандай? Клуб басшылығына қандай міндет қойылып отыр?
– «Алтай Өскемен» футбол клубының жаңа маусымдағы негізгі мақсаты — Қазақстан Премьер-лигасындағы орнын сақтап, үздік ондықтың қатарына ену. Сонымен қатар балалар мен жасөспірімдер футболын дамытуға ерекше көңіл бөлінеді. Клуб басшылығы ұзақмерзімді нәтижелерге бағытталған жүйелі жұмыс қалыптастырып, клубтың тұрақты әрі тиімді жоба ретінде дамуына жағдай жасауды көздейді.
– Команда құрамы қаншалықты жаңарды?
– Команда құрамының шамамен 80 пайызы Бірінші лига кезеңінен бері бірге өнер көрсетіп келе жатқан, клубтың Премьер-лигаға көтерілуіне үлес қосқан ойыншылардан құралған. Негізгі мақсат — өзара түсіністігі қалыптасқан, ойын мәнерін жақсы меңгерген ойыншыларды сақтап, осы құрамды Премьер-лигада тәжірибесі мол ойыншылармен және легионерлермен толықтыру арқылы күшейту.
– Қаржыландыру мәселесі толық шешілді ме?
– Әзірге қаржыландыру мәселесі толық шешімін тапқан жоқ, серіктестермен жұмысты жалғастырып жатырмыз. Легионер ойыншылардың еңбекақысы мен отандық ойыншыларға белгіленген лимитке байланысты қосымша қаржы қажет. Осы бағытта клуб жаңа серіктестер тарту үшін белсенді жұмыс жүргізіп жатыр.
– Клуб инфрақұрылымын (стадион, жаттығу базасы) ҚПЛ талаптарына сай жабдықтау үшін не істеліп жатыр?
– Маусым басталар алдында клуб инфрақұрылымды Қазақстан Премьер-лигасының талаптарына толық сәйкестендіруге және стадионның лицензиядан өтуіне ерекше назар аударды. Қазіргі уақытта стадион алаңының жабынын жаңарту, трибуна ішін жөндеу, LED-борттарды орнату және жарықтандыру жүйесін жетілдіру жұмысы атқарылып жатыр.
– «Алтай Өскемен» үйдегі ойындарын қайда өткізеді?
– Осы маусымдағы алғашқы екі үй ойынын Алматы қаласындағы «Хан Тәңірі» стадионында өткізеді. Кейінгі үй матчтарын Өскемендегі «Восток» стадионында өткізуді жоспарлап отырмыз.
– Клубты жекеменшікке беру мәселесі қарастырылып жатыр ма? Бүгінде әлеуетті инвесторлар бар ма?
– Клуб қазір жекеменшік құрылым ретінде қызмет атқарады. Сонымен қатар Президент Қасым-Жомарт Тоқаевтың футбол клубтарын коммерцияландыру жөніндегі тапсырмасына сәйкес, бұл бағытта жүйелі жұмыс жүргізіліп жатыр. Шығыс Қазақстан облысы әкімдігінің қолдауымен өңір кәсіпкерлерімен кездесулер өткізіліп, клубқа серіктестік орнату мәселелері жан-жақты талқыланды. Қазір негізгі әлеуетті инвесторлармен келіссөздер жүргізіліп, соңына таяп қалды.
– Жергілікті ойыншыларға мүмкіндік беріле ме? Қазір команда сапында Өскемен футбол мектебінен түлеген қанша футболшы бар?
– Команданың негізгі құрамында жергілікті мектептің сегіз тәрбиеленушісі бар. Оларға алдағы уақытта да тұрақты түрде мүмкіндік беріледі. Соңғы ойындарда клуб түлегі Сергей Хижниченко, Дмитрий Шмидт және Досжан Кенжеғұловтар алаңға шығып, жақсы ойын өрнегін көрсетті.
– Академия немесе футбол орталығын дамыту жоспары бар ма?
– Клубтың стратегиялық бағыттарының бірі — өз тәрбиеленушілерін даярлап, негізгі құрамды жергілікті ойыншылармен толықтыру. Осыған байланысты балалар мен жасөспірімдер футболын дамытуға ерекше көңіл бөлінеді. Жас футболшылардың республикалық жарыстармен қатар халықаралық турнирлерге қатысуына мүмкіндік жасалып жатыр және бұл ары қарай жалғасын табады.
– Клубтың жанкүйерлерін көбейту үшін қандай жобалар қолға алынады?
– Клуб Бірінші лигада өнер көрсеткен кезеңнен бастап тұрақты жанкүйерлік аудитория қалыптастыра алды. Қазір фан-клубты кеңейту және белсенділігін арттыру бағытында шаралар қолға алынған. Мысалы, Премьер-лиганың екінші туры аясында «Елімаймен» болған матчқа жанкүйерлерді апару үшін Өскеменнен Астанаға дейін арнайы 48 орындық автобус тегін ұйымдастырылды. Бұл жұмыс алдағы уақытта жалғаса береді.
– Әңгімеңізге рақмет!
