Шығыс Қазақстан облысында 1 қыркүйектен 31 желтоқсанға дейін күзгі әскерге шақыру науқаны өтеді. Биыл өңірден 800-ге жуық азамат әскер қатарына алынбақ, деп хабарлайды F16.kz.
Облыс көлемінде әскерге шақыру науқанын өткізу үшін 10 бөлімше мен медициналық комиссия жұмыс істейді. Отанын қорғау үшін Шығыстан аттанған сарбаздар еліміздің әр өңірінде борышын өтемек.
«Әскери қызмет және әскери қызметшілердің мәртебесі туралы» Заңға сәйкес, мерзімді әскери қызметке 18 бен 27 жас аралығындағы, әскерге шақыруды кейінге қалдыруға немесе босатылуға негізі жоқ ер азаматтар шақырылады. Әскерде қызмет ету мерзімі – 12 ай, — деп түсіндірді ШҚО Қорғаныс істері департаменті бастығының орынбасары Жәнібек Сапаров.
Технология дамыған заманда әскерге шақырылушыларды хабардар ету де цифрлық форматқа көшірілген. Қазір шақыру пунктеріне келу туралы ескертулер SMS және eGov порталының жеке кабинеті арқылы жіберіледі..
Медициналық комиссиядан әдейі жалтарған немесе келмеген азаматтарға әкімшілік және қылмыстық жауапкершілік қарастырылған. Яғни, айыппұл арқалауы мүмкін немесе бір жылға дейін бас бостандығынан айыру жазағы қолданылады, — дейді Жәнібек Сапаров.
Айта кетейік, әскери борышын өтеп келген азаматтарға Қорғаныс министрлігі тарапынан бірқатар жеңілдіктен қарастырылған. Мәселен, әскерге шақырылушыларға қызмет уақытына «несие демалысы» беріледі, сондай-ақ «Сарбаз 2.0» жобасына қатысуға мүмкіндік бар. Елдің 80-нен астам жоғары оқу орнымен жасалған келісімдерге сәйкес, мерзімді әскери қызметін абыроймен өтеп, жақсы нәтиже көрсеткен жастарды университеттер қосымша емтихансыз тегін қабылдайды.
