Елордада өзін бизнес-тренер ретінде таныстырған әйел 5 жылға бас бостандығынан айырылды. Ол адамдарды алдап 50 млн теңге көлемінде ақша алған, деп хабарлайды F16.kz.
Астана қалалық прокуратурасының баспасөз қызметі мәлім еткендей, сотталушы Instagram әлеуметтік желісі арқылы онлайн-сауда мен сатып алу саласында тренингтер өткіземін деп адамдарды алдап, клиент тартқан. Курс аяқталған соң, ол тыңдаушыларға тұрмыстық техниканы көтерме бағамен сатуға инвестиция салуды ұсынып, салған қаржыдан 10% табыс табасыз деп сендірген. Алайда ақша алған соң уәде етілген табыс та, әйелдің өзі де ізім-ғайым жоғалған
Сот үкімімен әйел кінәлі деп танылып, 5 жылға бас бостандығынан айырылды. Мемлекеттік айыптаушы оның кінәсін толық дәлелдеді. Алаяқтықтың 10 эпизоды бойынша келтірілген шығын көлемі 50 миллион теңгеден асады.
Айта кетейік, алаяқтық жасағандарға Қазақстан заңнамасында мүлкін тәркілей отырып, 10 жылға дейін бас бостандығынан айыру жазасы қарастырылған.
