Облыс орталығында Наурызнама онкүндігі аясында ұлттық құндылықтар мен дәстүрді дәріптейтін шаралар легі жалғасуда. Бүгін Бабкина Мельница шағын ауданының тұрғындары Наурыз мерекесін тойлап жатыр, деп хабарлайды F16.kz.
Жылдағы дәстүр бойынша «7-я Маркет» сауда желісінің алдында киіз үй тігіліп, сахна құрылған, сауда көркі де қызып тұр. Аудан тұрғындары мерекелік концерт ұйымдастырып, наурыз көже мен ыстық бауырсақ таратты. Мерекенің негізгі демеушісі – кәсіпкер Денис Сергеевич.
Наурыз мерекесі алғаш рет ұйымдастырылып отырған жоқ. Тұрғындармен бірлесіп жыл сайын Ұлыстың ұлы күнін атап өтеміз. Көңіл көтеріп, ән айтамыз, би билеп, түрлі ұлттық ойындар ойнаймыз, наурыз көжеден дәм татамыз. Өз тарапымыздан тек Бабкина Мельница шағын ауданында емес, «Жібек жолы» сауда кешенінің алдында және Ахмерде дәл осындай мереке ұйымдастыруды жоспарлап отырмыз, — деді «7-я Маркет» сауда желісінің директоры Денис Сергеевич.
Биыл мерекелік шараға тұрғындар мен №31 жалпы орта білім беретін мектебінің ұжымы мен оқушылары да белсене қатысқан.
Одан бөлек, бүгін белгіленген Ұлттық ойындар күніне арнап, асық ату, гир көтеруден де сайыстар өтіп, жеңімпаздарға сыйылқтар табысталды.
Шағын аудан тұрғындары өте ұйымшыл. Әр мерекеде осылай бас қосып, концерт ұйымдастырамыз. Әсіресе, Наурыз мерекесін халық асыға күтеді. Күн жылынып, көршілермен осы алаңда бас қосамыз. Шараға себепкер болған ұйымдастырушылар мен демеушілерге алғыс айтамын, — дейді аудан тұрғыны Татьяна Николаевна.
Айта кетейік, қала әкімдігі биыл Наурыз мерекесі қаланың бірнеше ауданында тойланатынын атап өткен. Яғни, мұндай шара алдағы күндері де бірқатар шағын ауданда жалғасын табады. Сондай-ақ 22 наурыз күні Республика алаңында Ұлыстың ұлы күніне орай басты шаралар ұйымдастырылмақ.
