Шығыс Қазақстан облысында «Бекет-2025» ведомствоаралық кешенді оқу-жаттығуы аяқталды. Оған орталық және жергілікті атқарушы органдардың, күштік құрылымдар мен жедел қызметтердің өкілдері қатысты, деп хабарлайды F16.kz.
Облыс әкімі Нұрымбет Сақтағановтың төрағалығымен өткен жиынға ҚР Қарулы күштері Бас штабының бастығы – қорғаныс министрінің бірінші орынбасары генерал-лейтенант Сұлтан Қамалетдинов қатысты. Жиында ведомствоаралық өзара іс-қимыл, түрлі қызметтердің күрделі жағдайларда бірлескен әрекеттерінің үйлесімділігі және халықты құлақтандыру тәртібі талқыланды.
Генерал-лейтенант Сұлтан Қамалетдинов жергілікті атқарушы органдардың іс-әрекетіне баға беріп, олардың ерекше жағдайларда жұмыс істеуге даярлығын атап өтті. Сонымен қатар азаматтарды уақтылы хабардар ету мен барлық құрылымдардың үйлесімді жұмысының маңызына тоқталды.
Оқу-жаттығу аясында Бас штаб бастығы облыс әкімдігі жанындағы жедел-талдау орталығы мен шұғыл әрекет ету бойынша практикалық іс-қимылдар пысықталған оқу алаңдарын аралады.
Мұндай оқу-жаттығулар барлық құрылымдардың дайындық деңгейін тексеруге, шынайы жағдайларда әрекет ету алгоритмдерін пысықтауға және одан әрі жетілдіру бағыттарын айқындауға мүмкіндік береді. Мемлекеттік органдардың келісімді әрі жедел жұмысы – азаматтардың қауіпсіздігінің кепілі, – деді генерал-лейтенант С.Қамалетдинов.
Аймақ басшысы Қорғаныс министрлігінің өкілдеріне оқу-жаттығуды жоғары деңгейде ұйымдастырып, өткізгені үшін алғыс білдіріп, мұндай іс-шаралардың өңір үшін ерекше маңызға ие екенін атап өтті. Оның айтуынша, бұл бірлескен іс-қимылдың нақты тәртібін қалыптастыруға, дайындық деңгейін арттыруға және азаматтардың мемлекеттік органдардың кез келген қауіпке тиімді әрекет ете алатынына деген сенімін күшейтуге мүмкіндік береді.
Іс-шара қорытындысы бойынша дайындық деңгейін арттыру және анықталған кемшіліктерді жою жөнінде нақты тапсырмалар берілді.
