Өскемен тұрғындары “бірінші қалалық аурухана” атап кеткен Шығыс Қазақстан облыстық мамандандырылған медициналық орталығында күрделі жөндеу жұмыстары жалғасып жатыр. Таяуда мұнда инновациялық медицина бөлімінің жөндеуі аяқталды, деп хабарлайды F16.kz.
Бұл туралы облыс әкімінің бірінші орынбасары Жақсылық Омар әлеуметтік желідегі парақшасында жазды.
Кеше ғана инновациялық медицина бөлімінде күрделі жөндеу аяқталды. Мұнда ғимарат толығымен жаңартылып, инженерлік жүйелер ауыстырылды, медицина қызметкерлері мен науқастар үшін заманауи жағдай жасалды. Бөлім ұжымымен және ем қабылдап жатқан пациенттермен кездесіп, пікір алмастым, барлығы жағдайдың айтарлықтай жақсарғанын атап өтті, – деп жазды Жақсылық Омар.
Облыс әкімінің бірінші орынбасары медицина мекемесін күрделі жөндеу аймақ басшысының тапсырмасымен әзірленген «Шығыс Қазақстан облыстық мамандандырылған медициналық орталығын жаңғыртудың кешенді жоспары» аясында жүзеге асырылып жатқанын айтты.
Жоспарға сәйкес, өңірдің басты ауруханасын кезең-кезеңімен жаңарту көзделген.
Бұған дейін біз жөндеу жұмыстарының басталғаны және жаңартылған гинекология бөлімшесінің ашылғаны туралы жаған едік.
